CEBU, Philippines - Ang gipaabot nga Cebu City My City Games buksan na karong adlawa diha sa Cebu City Sports Center (CCSC).
Kapin sa 80 ka barangay gikan sa North ug South districts sa siyudad sa Sugbu ang magpinaksitay sa torneyo nga gibahin ngadto sa duha ka division nga mao ang – 18 to 39 yrs.old ug 40-above.
Sugdan ang liga pinaagi sa parada sa alas-7 sa buntag. Ang mga koponan gikan sa South district manukad diha sa Cebu City Hall grounds paingon ngadto sa CCSC, samtang ang mga North district teams mobuylo diha sa Fuente Osmeña circle paingon sa CCSC.
Si Cebu City Mayor Tomas Osmeña maoy pinasidunggang dinapit ug mamumulong sa opening ceremonies uban ni Vice Mayor Michael Rama ug kaubanan sa konseho ug ingon man mga opisyales sa kabarangayan.
Mga barangay nga moduwa ubos sa North districts mao ang Apas, Carreta, Cogon-Ramos, Day-as , Hipodromo, Lahug, Lorega-San Miguel, Mabolo, Luz, Pahina Central, Sambag II, Parian, San Roque, Sta. Cruz, T. Padilla, Talamban, Tinago, Kamagayan, Ermita, Pulangbato, Busay, Malubog ug Lusaran.
Naglangkob sa South district mao ang barangay Guadalupe, Basak-Pardo, Buhisan, Suba, Calamba, Toong, Tabunan, Punta Princesa, Pasil, Sibugay, Sudlon 1 ug II, Kalunasan, San Nicolas Proper, Inayawan ug Duljo-Fatima. – BANAT NEWS