UTASSCO miangkon sa Game-1 sa Power Forty x-mas league

CEBU, Philippines - Nagmangtas sila si Alex Mercado ug Wilbor Cabrera diin nagkumboya sila og 35 puntos aron pangulohan ang UTASSCO Utility alang sa 86-83 nga kadaugan batok sa Park N' Go Bakeshop sa Game-1 sa ilang best-of-three" finals sa Power Forty Christmas League basketball tournament diha sa Inayawan Sports Complex, ning siyudad.

Sikit kaayo ang duwa gikan sa sinugdanan ug walay bisan usa kanila nga nakalabaw og kapin sa 10 puntos.

Si Jun Nacional mitarok og 14 puntos aron pangulohan ang UTASSCO Utility, gisundan ni Dennis Batac nga misilhig og 10 puntos, samtang si team owner Atty. Flor Yosores mitampo og otso puntos.

Ang Park ‘N Go gipangulohan sa ilang ace pointguard Michael Arias, kinsa mihaon og 23 puntos, samtang laing upat niya ka teammates ang milunod og double figures lakip na niini si team owner Romy Rama ug ang pag-umangkon niining si Raul Rama nga miposa og 10 puntos matag usa.

Sa duwa alang sa ikatulong dapit, ang Water Market ni Vez Eleguin mipukan sa wwe.fedguns.ph sa iskor nga 109-98.

Si Eleguin maoy topscorer sa Water Market nga miburak og 29 puntos, samtang sila si Gideon Bughao ug Simoy Yosores parehong mi-iskor og 20 puntos ug si Edwin Dejacto miamot og 15 puntos.

PUNTOS MATAG USA

Unang duwa:

Water Market (109) - Eleguin 29, Bughao 20, Yosores 20, Dejacto 15, Dela Rama 12, Abellana 9, Cayacap 4,

fedguns (98) - Javierto 20, Mabalcon 20, Abadejos 12, Nacario 12, Cabanero 10, Ibones 9, Ramil 9, Abarquez 6

Ikaduhang duwa:

UTASSCO (86) - Mercado 19, Cabrera 16, Nacional 14, Batac 10, Yosores 8, Pestano 7, Escalon 6, Abasolo 4, Yu 2

Park ‘N Go (83) - Arias 23, Echavez 16, Layon 11, Raul Rama 10, Romy Rama 10, Atillo 5, Ozon 4, Lalican 2, Dejarme 2 (FREEMAN NEWS)