San Fernando abante sa finals

CEBU, Philippines - Naangkon sa San Fernando ang katapusang luna sa finals human sa ilang 90-83 nga kadaugan batok sa Sibonga sa 2009 Gullas Cup men's basketball tournament didto sa Minglanilla Sports Complex. 

Sa maong kadaugan, ang San Fernando maoy nakaangkon og katungod sa pakigharong sa defending champion Talisay alang sa kampiyonato karong Domingo.

Ang San Fernando sa giya nilang Jun Vincent Pasilan ug Ryan Obaob miposte og otso puntos sa halftime, 37-29, apan ang Sibonga mibawos pinaagi sa paglusad og 16-5 rally sa final period nga nakapahilis sa labaw ngadto na lang sa kuwatro puntos sa nahabiling uno minuto sa duwa, 87-83. Apan didto ra kutob ang ilang maayong nahimo kay nalansang ang ilang iskor sa nahabiling mga gutlo.

Ang tres ni Junard Caparida sa katapusang 24 segundos maoy miselyo sa kadaugan sa San Fernando.

Sa laing aksiyon, gilat-an sab sa host team Minglanilla ang nanulong nga Carcar sa iskor nga 83-68.

Ang Minglanilla magpaabot na lang sa modaog sa duwa tali sa Carcar ug Naga karong Sabado alang sa ikatulong dapit.

PUNTOS MATAG USA

Unang duwa:

San Fernando (90) - Pasilan 24, Ramo 17, Sasuman 16, Caparida 11, Delos Santos 10, Obaob 6, Manlosa 4, Dela Torre 2

Sibonga (83) - Limbaga 28, Wong 19, Estudillo 18, Laure 11, Rama 4, Chan 3

Ikaduhang duwa:

Minglanilla (83) - Canonigo 18, Del Soccoro 14, Vasquez 12, Pardillo 9, Plarisan 8, Bono 6, Macasling 6, Adlawan 6, Racho 2, Tañola

Carcar (68) - Macasero 17, Navarro 14, Nacua 11 Camingaw 8, Bacon 4, Alcover 6, Del Rosario 4, Solon 4 (BANATNEWS)