Gregorio bumilib sa husay ni Yap, napiling PBA PoW

MANILA, Philippines - Binansagan bilang “Samboy Lim ng Visayas’, nagpa-kitang gilas na agad si Roger Yap sa lahat upang ipakilala ang sarili noong naglalaro pa ito sa University of San Jose Recoletos.

Hindi natinag sa pag-arangkada, lalong hinasa ng 32-anyos na manlalaro ng Purefoods Tender Juicy Hot­dogs ang kakayahan sa tulong ng tiwala ni coach Paul Ryan Gregorio na bilib sa tikas ng kanyang laro at tinuturing na isa mga maasahan pagdating sa depensa. Subalit hindi lamang dito natuon ang kanyang husay nang magsalansan ito ng 21 points para itakas ang pa­nalo ng koponan kontra sa mapanganib na Barangay Ginebra, 89-81.

Bunga ng pagpupursige, nalampasan ng TJ Hotdogs ang hamon ng Gin Kings at naitala ang ikatlong sunod na panalo para tumabla sa de­­­fending champion Talk N Text at Ginebra na may 7-4 kartada.

Bilang parangal, napisil ng PBA Press Corps si Yap na tanghaling Accel-KFC Pla­yer of the Week para sa Nobyembre 30 - Disyembre 6. Sa pangkaraniwan, nag­lista si Yap ng 16 points, 4 rebounds, 4 assists, 1 steal, 0.5 blocked shot at 3.5 errors sa loob ng 23.5 mi­nutong nilaro niya sa da­lawang laban.

“He’s been a fighter all his life. He’s been the most con­sistent defender among our guards. That’s already a given,” pahayag ni Gregorio.    Bukod sa naiambag na puntos, naging pangunahing ar­mas ito ng Hotdogs upang harangin ang opensa ng Gin Kings na pinangungunahan nina Enrico Villanueva at Rich Alvarez. (SNF)