1st RP-Japan Gateball sa Mandaue

CEBU, Philippines - Mga sakop sa Japan Gateball Union ang motaak sa dakbayan sa Mandaue alang sa 1st Philippine-Japan Gateball Friendship Game karong alas-9 sa buntag diha sa gateball court sa Pajara Park ubos sa Marcelo Fernan bridge.

Ang gateball susama kini sa duwa nga croquet didto sa Europe ug ang maong duwa unang naila diha sa Mandaue dihang gipaila kini ni Noboru Watanabe, ang presidente sa Japanese Busin (Gateball) Club.

Ang gateball usa ka mallet sport susama sa croquet ug   minilyon ka tawo ang niduwa niini sa Asia ug sa South America.

Duwaon kini sa rectangular court nga may gitas-on nga 20-25 metros

ug 15-20 metros ang gilapdon.

Kasagaran niini duwaon sa balili, apan mahimo sab kini sa yuta, batoon ug sa semento. Ang matag korte adunay tulo ka gates ug usa ka goal pole. Duha ka teams ang magduwa niini (red ug white) nga langkuban og lima ka players.

Ang coordinator nga si Jesus 'Boy' Barz, nagkanayon nga ang mga teams nga mosalmot naglakip sa duha ka koponan gikan sa Japan Gateball Union, Manila-Japan Gateball Club ug Cebu-Japan Gateball Club. – BANAT NEWS