Gorres nakadawat hinabang gikan sa PSC

CEBU, Philippines - Wala kapugong sa pagpatulo sa iyang luha ang mother-in-law ni Z Gorres nga si Zureni Micabani human makadawat sa tseke nga nagkantidad og P100,000 nga financial assistance gikan sa Philippine Sports Commission kagahapon didto sa Malacañang sa Sugbu.

Si Micabani uban sa upat ka anak ni Z nga sila si Dheybert, Shylady, Zhey ug Coddy ug sa igsuon ni Z nga si Myla Mandawe mao ang midawat sa tseke sa ngan sa asawa niini nga si Datches, kinsa atua karon sa Estados Unidos.

Si Datches migikan paingon sa Estados Unidos niadtong miaging adlaw aron personal nga moatiman ni Z didto sa   University Medical Center (UMC) sa Las Vegas.

Si Micabani nga nahinabi sa Banat News, nagkanayon nga gamiton nila ang salapi alang sa mga galastuhon sa mga anak ni Gorres nga nahabilin dinhi sa Sugbu.

Matud ni Micabani nga dugay pang mobalik sa Pilipinas sila si Z ug Datches kay kinahanglan pang ipaubos sa rehabilitasyon ang ALA boxer didto sa Estados Unidos.

Sa laing bahin, ang unod sa suwat ni PSC Chairman Harry Angpin nga gibasa ni Executive Director ug PSC Commissioner Fr. Vicente Uy nagkanayon nga gimandoan sila ni President Gloria Macapagal-Arroyo nga hatagan og hinabang ang pamilya ni Z Gorres, kinsa nakahatag na og daghang dungog sa nasud pinaagi sa pagdaog sa iyang mga away.

Si Paul Hubahib, ang head sa Central Philippines Super Region ubos sa buhatan sa Press Secretary, miingon nga dili kini ang katapusang tabang nga ilang ihatag ngadto sa boksidor. Matud niya nga mag-agad sila ni Gorres kun unsa pa ang mga kinahanglanong tabang niini sa umaabot nga panahon.

Giangkon sa mother-in-law ni Gorres nga nasakitan sa nahitabo sa iyang umagad ilabi na dihang mikatap ang text messages nga namatay ang world champion.

 “Grabe kaayo ang uban nagpataka na lang og pamalita nga wala man sila nakahibalo sa tinuod. Kun ma-ok na siya, kung pwede lang gyud tawon, dili na siya mag-boxing, naa pa man dihay laing kapangitaa'g trabaho ba,” matud ni Micabani.

Gawas sa PSC, nakadawat na sab ang pamilyang Gorres og P100,000 gikan sa kagamhanan sa dakbayan sa Mandaue ug ang kagamhanan sa Probinsiya sa Sugbu, Gov. Gwen Garcia, P25,000. Si Garcia mao sab ang miabaga sa plane ticket ni Datches paingon sa Estados Unidos. Mihatag usab si kongresista Pablo John Garcia og P25,00 ug ang Games and Amusement Board (GAB) og P50,000. – BANAT NEWS