Umaabot nga kampiyon

CEBU, Philippines - Maayong ugma sa kalibotan sa motocross ang mapaabot sa managsuong Ornopia nga sila si Earl Jean Brylle, Ken Kerry Jean ug Kerry Keizer.

Kini gumikan kay sa ilang kalinghod sa pangedaron, mihimo na kini og mga tilimad-on nga mosidlak sa maong delikadong matang sa paugnat sa kusog.

Nagtipun-og ug dili na matupngan ang titulo nga nakuha ni Brylle, sukad sa iyang pag-apil sa karera niadtong miaging tuig.

Sa pagka karon, medyo naglaway si Brylle pagkabayo sa bag-o niyang motorsiklo (KX65 Kawasaki) nga gipalit sa iyang mga ginikanan nga sila si Siegfred ug Ellen niadtong miaging adlaw.

Si Brylle, 9-anyos, ang kinamaguwangang anak sa magtiayong Ornopia nakaangkon og injury sa tuo niyang tiil dihang misuway siya'g double-jump atol sa iyang practice run, apan mikumbati gihapon siya ug iyang nadominar ang mini division sa 16th leg sa 2009 MS Motosuit Motorcross Series didto sa Liburon, Carcar City.

“Bisa’g gisemento pa lagi ang iyang tiil, gusto nang mosakay. Naglaway gyud siya paggamit sa bag-o niyang motor,” matud ni Siegfred. 

Sila si Ken-Ken, 7-anyos ug Keizer, 5-anyos mihinay-hinay sab og sunod sa tunob sa ilang maguwang dihang   ilang gidominar ang peewee division.

Matud pa ni Siegfred, ang "2008 Rider of the Year" sa MS Motosuit Series, mitug-an nga bisan og delikado ang motocross, apan alang kaniya mas maayo na lang ni kaysa mahaylo sa dautang mga bisyo.

Gani ang tulo adunay tagsa-tagsa nga gi-idolo. Si Brylle, nag-ilodo ni Ryan Villapoto, si Ken-Ken nag-idolo ni Jim Stewart ug si Keizer ni Chad Reed.

Gituohan nga ang tulo mohatag og dakung dungog sa Sugbu ugma damlag. – BANAT NEWS