CEBU, Philippines - Gipalagpot na sa Scourge team ang Emilmich pinaagi sa pagpukan, 67-63 sa elimination round sa nagpadayong JS Contractors’ Cup 2009 basketball tournament diha sa Vicente Sotto Memorial Gym sa barangay Punta Princesa, ning dakbayan.Sa laing mga duwa, ang Victor Village mikulit sab og daog human nila giihaw ang Blue Marlins sa iskor 69-60, samtang ang Ritchie team milubong sa Soil Guard sa iskor nga 74-63.
Sayong nanginit ang Emilmich ni team owner Emily Badon ug nakahimo kini pagrehistro og 10 puntos nga labaw sa halftime, 35-25, apan ang Scourge hinay-hinay nga mikitkit sa labaw ug miabot na lang og kuwatro puntos sa iskor nga 45-49 paingon sa fourth period pinaagi sa nagtusaktusak nga mga tirada nilang Richard Arco ug Dagol Alison aron masakmit ang labaw sa labing unang higayon, 64-63 sa nahabiling 1:30 sa duwa ug wala na kini molingi pa sukad niadto.
Ang kadaugan naghatag sa Scourge og 4-3 nga baraha, samtang ang Emilmich, kinsa nanamilit bitbit ang 4-4 nga baraha.
Si Arco maoy nangulo sa Scourge pinaagi sa iyang 21 puntos, samtang si Alison miamot og 13 puntos. Si Mascardo mitampo og 10 puntos lakip ang krusyal nga three-pointer. Ang pilderong Emilmich gipangulohan ni Robin Tagaloguin sa iyang 15 puntos.
Unang duwa:
Scourge (67) - Arco 21, Alison 13, Mascardo 10, Tobes 7, Castro 7, Paracueles 7, Kakang 2
Emilmich (63) -Tagaloguin 15, Ilagan 8, J. Llenes 8, Vinalon 6, Badon 6, V.Llenes 6, J. Olpoc 4, Cabahug 4, A. Olpoc 2, Janola 2, Econas 2
Ikaduhang duwa:
Victor Village (69) - Rabadon 23, T. Carungay 16, Alcantara 16, Empenedo 6, J. Carungay 2, Sotes 2, Juntilla 2, Sepe 2
Blue MaRlins (60) - Bacabs 14, Ebrada 12, Renbac 9, Vallejo 8, Amat 6, A. Yray 5, P. Yray 4, Padigos 2
Ikatulong duwa:
RiTchie (74) - Gonzales 26, Paguntalan 13, Pagara 12, Emecillo 12, Padigos 3, M. Canencia 2, Z. Canencia 2, Abay 2, Licaros 2
Soil Guard (63) - Abastilla 15, Caparoso 12, R. Saberon 12, Castanares 11, L. Saberon 7, Cabunilas 4, Ragas 2. - BANAT NEWS