Cebu Niños hari sa "Super Leg"
CEBU, Philippines - Mihimo og kasaysayan ang M. Lhuillier Kwarta Padala-Cebu Niños human giharos ang 21 nila ka duwa aron sakmiton ang korona sa Liga Pilipinas Conference 3 niadtong Domingo diha sa Cebu Coliseum.
Mao sab kini ang unang higayon sa Niños ni team owner Michel J. Lhuillier ug coach Raul 'Yayoy' Alcoseba nga mimakmak sa Misamis Oriental Meteors, 89-54 sa ilang finals game nga walay pilde.
Ang "coach of the year" nga si Alcoseba nagkanayon nga daku og natabang ang mga tune-up games nila batok sa mga koponan sa PBA nga maoy naghatag kanila og dugang kasinatian ug kompiyansa paingon sa Super Leg.
Grabeng kastigo ang gibuhat sa Niños sa finals batok sa Meteors, kinsa wala gyud makatilaw og labaw human birahi og 10-6 rally aron pagposte og 13 puntos nga labaw sa first period.
Gawas sa nagpungasi nilang atake, gipatuman usab sa Niños ang ilang makatuok nga depensa. Gitak-opan sa Niños ang first half sa iskor nga 44-20 ug giinat pa nila kini ngadto sa 37 puntos sa iskor nga 80-43, human sa tres ni Woodrow Enriquez sa nahabiling 3:55 sa duwa.
Si Ababon mibugha og 14 puntos, gisundan ni Franklin Nailon nga adunay 13 puntos, samtang ang naparot nga Meteors gipangulohan ni Mark Moreño, kinsa mikabkab og 14 puntos.
Ang Sugbuanong si Stephen Padilla, kinsa maoy napiling MVP mipupo og 12 puntos, duha ka assists, duha ka rebounds ug duha ka steals. (BANATNEWS)
- Latest
- Trending
