CEBU, Philippines - Ang gamhanang Hoopers mikulit sa ikalima nilang sunod-sunod nga daog human maka-ipsot batok sa mangtas nga Wildcats, 66-63 sa Philippine Institute of Certified Public Accountants (PICPA) 2009 basketball tournament diha sa Vicente Sotto Memorial Gym sa barangay Punta Princesa, ning dakbayan.
Ang Hoopers mikulit og 22-14 nga abante sa first period pinaagi sa pagtambayayong nilang Andre Tocao ug Hermy Veltran, apan ang Wildcats mi-rally aron sakmiton ang labaw sa halftime, 36-34 kortesiya sa mapintas nga opensa nilang Sonny Dequina ug Benedict Bandala.
Gumikan niini, ang Hoopers mipatuman sa ilang solidong depensa nga gipasiugdahan nilang Yoli Meso ug sa toroto'ng point guard nga si Jeremy Makinano aron ilogon og balik ang labaw, 54-51 human sa third period.
Ang Wildcats milabaw sa katapusang higayon sa iskor nga 61-58 sa nahabiling dos minutos sa duwa kay sila si Julius Makinano ug Tocao mitusak og krusyal nga mga baskets aron luwason ang Hoopers.
Si Tocao maoy nangulo sa Hoopers pinaagi sa iyang 24 puntos, gisundan nilang Lito Ortiz ug Makinano nga miabuno og 10 puntos matag usa.
Ang pilderong Wildcats gipangulohan sab ni Ryan Alejandre, kinsa mi-iskor og 24 puntos.
Sa laing duwa, ang Warriors mi-ihaw sa Timberwolves sa iskor nga 82-67 alang sa ikatulong daog sulod sa lima ka duwa.
PUNTOS MATAG USA
Unang duwa:
Hoopers (66) - Tocao 24, Ortiz 10, J. Makinano 10, Veltran 8, Makinao 6, Meso 6, Roble 2
Wildcats (63) - Alejandre 24, Dequina 16, Bandala 11, Dingal 10, Penas 2
Ikaduhang duwa:
Warriors (82) - Seares 23, Vivares 20, Patatag 8, Deatriza 8, Ocupe 7, Santiago 6, Acedillo 6, Sevilla 4
Timberwolves (67) - Barot 25, Entica 23, Catipay 7, Yap 5, Huyo-a 3, Magsalay 2, Ongayuren 2 (BANATNEWS)