Dwight ug Vince mituboy sa Magic

CEBU, Philippines - Parehong mipabuto ug 25 puntos sila si Dwight Howard ug Vince Carter aron pagbaswat sa Orlando Magic ngadto sa kulbahinam nga kadaogan batok sa Milwaukee Bucks sa iskor, 100-98 kagahapon sa nagpadayong 2009-2010 NBA season didto sa Bradley Center sa Milwaukee, Wisconsin.

Hinuon dili sayon ang maong kadaogan kay nagisian si Carter ug nagkinahanglan pa kini'g upat ka tahi.

Ang 11-footer nga tirada ni Rashard Lewis sa kataposang 44 segundos maoy nakapadaog sa Magic kinsa mihulga na sab sa pagsakmit sa liderato sa East Conference nga kasamtangang gihuptan sa Atlanta Hawks. Ang Magic aduna na karo’y 13-4 nga baraha.

Ang Magic naglabaw na unta og 11 puntos, 91-81 sa kataposang 5:27 sa fourth period apan hinay-hinay kining gipapas sa Bucks ug gitabla kini sa rookie nga si Brandon Jennings sa iskor 95-all may 2:45 ang nahibiling oras sa duwa.

Sila si Ersan Ilyasova ug Luke Ridnour parehong mipuntos ug 25 aron pangulohan ang Bucks. Si Ilyasova mihakot og career-high 16 ka rebounds ug si Ridnour mihakot sa iyang 20 puntos gikan sa bench.

Sa laing bahin, gilumsan sa Los Angeles Lakers ang Golden State Warriors, 130-97 diin pito sa ilang players ang mihakot og double figures pinangulohan ni Paul Gasol kinsa miposa ug 22 puntos uban ang iyang 12 ka rebounds.

Laing mitapos og double figures mao sila si Kobe Bryant sa iyang 20 puntos, Ron Artest 19 puntos, Shannon Brown 17 puntos, Derek Fisher 13 puntos, Andrew Bynum 12 puntos ug Jordan Farmar 10 puntos.

Sila si Monta Ellis ug Corey Maggette maoy nnagu sa Warriors sa ilang 18 ug 17 puntos matag usa.

Sa lain pang duwa, midaog ang Cleveland batok sa Dallas, 111-95 ug parehong miburak og 25 puntos sila si LeBron James ug Mo Williams samtang si Anderson Varejao miamot ug 15 puntos.

Ang Dallas gipangulohan nilang Dirk Nowitzki ug Jason Terry kinsa pareho sab mitunol ug 27 puntos.

Gikulata sa Utah ang Portland, 108-92 ug midaog ang Charlotte batok sa Washington, 90-78. - GGM viaNBA.com (BANAT NEWS)