Batawang bag-ong WBO Asia Pacific champ

CEBU, Philippines - Gipamatud-an ni Bert Batawang nga dili babag ang iyang pangidarun aron mahimong kampiyon dihang gisakmit niya ang WBO Asia Pacific light flyweight title didto sa Linyi, China.

Ang beteranong boksidor sa SGG Stable mipahunong sa Indonesian nga si Jack Amisa sa oras nga 1:45 sa ikalimang round aron makuha ang WBO title. Atubangan sa 5,000 ka mga boxing fans, gipakita sa Sugbuanong boksidor ang iyang kakusug dihang gipalukapa si Amisa.

Ang WBO Asia Pacific chairman nga si Leon Panoncilio kinsa personal nga mitan-aw sa away nagkanayon nga human makuha ni Manny Pacquiao ang WBO welterweight title gikan ni Miguel Cotto, laraw niya karon nga mopahigayun pa og laing dagkung boxing event nga mopakita sa abilidad sa mga Pinoy boxers sa Enero sa sunod tuig.

Hinuon, lahi ang kapalaran nga gidangatan sa laing Pinoy contender nga si Fernando Lumacad human siya gipilde sa Mehikanong si Juan Jose Montes kinsa miiskor og usa ka majority decision.

Si Lumacad napakyas sa iyang tinguha nga mailog ang WBC Youth super flyweight title ug nakaangkon usab siya sa ikatulong pilde sa iyang karera isip professional boxer.

Laraw unta ni Lumacad nga sundon ang dalan ni Rodel Mayol kinsa mao ang bag-ong WBC titlist, apan wala siya musalir batok sa mas kusgan ug mas preparado nga si Montes. - Lemuel P. Maglinte gikan sa Philbox (BANAT NEWS)