Maguindanao Massacre

CEBU, Philippines - Usa ka adlaw human mapili ang Pinoy nga si Efren Penaflorida nga CCN Hero of the Year, nahurot ang akong bilib sa atong mga kababayan ilabi na kay nahitabo kadto usa lang ka semana human ang laing E.P. nahimong kampiyon sa boksing si Emmanuel Pacquiao.

Gani nakahukom dayon ako nga kini maoy akong hisgotan karong semanaha ug dili ang naandan nga mga paugnat sa kusog agi'g pagduyog sa kasubo sa atong mga kaigso-onan sa media.

Apan ang akong kaikag pagsuwag sa maayong birtud ni Penaflorida, nahulipan ug kalagot ug kasakit sa nahitabo ngadto sa atong mga igsoon sa media nga gipang-massacre didto sa Maguindanao. Inay mag-cover lang unta og usa ka politikanhong kalihokan, napagan lang intawon ang mga inosenteng sakop sa prensa sa mga linoog ug tinalawan nga pagpatay. Ambot lang kaha og wala pa sila'y armas mag-inisog ba lang gihapon sila ug ambot og wala pay molaban nilang politiko isog ba kaha gihapon sila.

Ang nakadaot gud niining ubang mga bata-bata sa politiko kay pwerteng hambugero-a ilabi na og makagunit og armas. Sa akong tan-aw, kung wala tingali sila'y armas, malupig kini nato'g sumbagay ilabi na’g makatilaw og straight dresto sa baba, magbuntag tingalig punit sa ngipon ug magsikma pa gyud og kasahos.

Kining mga matanga sa tawo dili angay pasanayon. Angay ning po-uhon mentras sayo pa kay sagbot sila sa katilingban. Mao kining mga matanga sa tawo nga mura’g langaw nga nakatungtong sa buko-buko sa kabaw ug nagdahum nga kabaw na sab sila.

Wala ako'y nailhan bisan og usa na lang ka sakop sa media nga namatay apan kung imong hinuklogan ang nahitabo kanila, makahilak ka maghuna-huna, maglagot ka ug murag kumoton imong kasingkasing. Ang mga kabanay naghuna-huna na pagkilaw sa mga salbahis nga wala'y suka-suka.

Ambot unsa kahay nakaon sa mga talawan nga suspetsado nga ila mang gipanghurot og patay bisan walay labot? Na-eksamen ba kaha pag-ayo ang ilang mga utok ilabi na ang utok sa mga mastermind niadtong linoog nga krimen. Maayo unta sunod kinsa kadtong magtukod og private armies magkontak una og “psychiatrist” aron dili malakip sa peligro kining mga sakop sa media nga igo lang mosulti sa tinuod.

Numero uno kita sa boksing, numero uno sa pagka-maayong laki kalabot sa pag-edukar sa katawhan kay gani bisan mga street children nakamao na pagsuwat ug pagbasa tungod sa iyang gisuroy-suroy nga “KARITON CLASSROOM” nga gipasiugdahan ni Penaflorida ug sa iyang Dynamic Team Company.

Kinsa may dili mahimong mapasigarbohon nga sulod sa kapin nuybe mil ka nominees, Pinoy pa gyud ang midaog ug si Penaflorida nga nailhan sa tawag nga “Kuya Ef”, nakakuha og kapin sa siete mil ka boto on-line.

Daan na tingaling nadestino sa kapalaran nga si Penaflorida, ang 28-anyos nga taga Cavite mao gyu'y modaog sa CNN Hero of the Year. Ang CCN mahimo sab ingnon —Caviteno Ni Nyor. (joke) Makahinumdum ko sa campaign slogan ni Congressman Tony Cuenco diri sa South—Cuenco Naa Nato.

Balik hisgot sa linoog nga krimen, gipahibalo na sa mga estasyonan sa TV nga ang Pilipinas na maoy labing delikadong lugar kung kahimtang sa seguridad sa media ang hisgotan ug nalupigan na nato ang Iraq nga kanunay dunay mahitabong pagpamomba ug gubat. Nadugangan gyud intawon ang pagka-numero sa Pilipinas nga usa sab sa pinaka-corrupt nga nasud sa tibuok kalibotan.

Akong gi-awhag ang tanang sakop sa media bisan pa og sports maoy ilang gi-koberan nga moduyog kita sa tanang katawhan sa pagkondena niining Maguindanao Massacre.

Karon nga nasikop na ang numero unong suspetsado nga si Mayor Andal Ampatuan Jr. unsa may sunod lakang nga himoon sa kagamhanan ni Presidente Gloria Macapagal-Arroyo. Duna kahay hustisaya nga makab-ot ang mga biktima ilabi na ang mga sakop sa media? Duol na ang Pasko ug angayan gani unta sila maglipay uban sa ilang pamilya taliwala sa kakabus ug kanihit sa kwarta.

Akong personal nga awhag nga ipasikop gyud tanan kung kinsay nakasala o kinsay naghimo sa maong krimen kay daku kining pagyatak sa katungod sa media ug pagkalumpag sa atong demokrasya.

Miscellaneous. Both the UV Green Lancers and the UC Webmasters were ousted by their Manila rivals in the PCCL Sweet 16. Tonight, the USC Warriors hope to advance to the Elite 8 when they clash against the NCAA champion San Sebastian College (SSC) Golden Stag of rookie and champion coach Renato “Atom Bomb” Agustin in Ormoc City.