Sibonga batok Minglanilla

CEBU, Philippines - Ang Sibonga manulong sa Minglanilla uban ang paglaum nga modaog sa pagpadayon sa 2009 Gullas Cup men’s basketball tournament karong adlawa didto sa Minglanilla Sports Center.

Laraw karon sa Sibonga nga mobangon human sila gilubong sa Carcar sa iskor nga 105-81 sa ilang opening game niadtong Nobiyembre 14 didto sa Carcar Sports Complex.

Apan ning higayona, sangkaon sa Sibonga ang host team nga Minglanilla, kinsa nagpangita usab sa una nilang daog sa torneyo.

Likayan sa duha ka koponan nga masugamak sa 0-2 nga baraha sa sayong bahin sa elimination round aron mahayagan pa ang ilang paglaum alang sa kampiyonato nga nagtangag og P30,000 nga ganti ug ingon man tropeyo.

Ang Gullas Cup usa ka tinuig nga kompetisyon nga gipasiugdahan sa Cebu 1st District Representative Eduardo 'Eddie' Gullas ug sa iyang apo nga si Samsam Gullas nga   maoy tournament director.    (BANATNEWS)