Cebu Niños, 2-0 na

CEBU, Philippines - Walay kukaluoy nga gilubong sa M. Lhuillier Kwarta Padala-Cebu Niños ang bisitang Laguna Trace-Stallions, 97-72 aron pagposte og 2-0 sa nagpadayong Liga Pilipinas Conference 3 "Super Leg" kagabii diha sa Cebu Coliseum.

Nakuratan ang Cebu Niños dihang gibiyaan kini sa Stallions og singko puntos nga bentaha paghuman sa unang 10 minutos sa duwa sa iskor nga 18-23.

Hinuon ang gamhanang Cebu Niños nakarekober sa sunod nga kuwarter ug nailog nila ang momentum. Ang Cebu Niños nga seryoso sa ilang kampanya pag-ilog og balik sa korona, milusad og 28-16 run aron pagposte og 71-55 nga labaw dayon sa final period.  

Ang Cebu Niños ni Michel J. Lhuillier ug coach Raul 'Yayoy' Alcoseba, gipangulohan ni Conference I MVP Marlon Basco, kinsa mibugha og 23 puntos. Samtang ang pilderong Stallions gipangulohan sab ni Ron Capati pinaagi sa iyang 20 puntos.

Puntos Matag Usa

Cebu (97) - Basco 23, Santos 21, Saladaga 14, Dacia 11, Padilla 11, Mepaña 10, Enriquez 9, Magsumbol 8, Ababon 7, Poligrates 2

Laguna (72) – Capati 20, Losente 12, Estrada 12, Sanz 11, Mangahas 9, Villaver 3, Angeles 2, Grijaldo 2, Musni 1. – BANAT NEWS