UV mag-fund-raising alang ni Z Gorres

CEBU, Philippines - Usa ka fund-raising campaign ang ilusad sa University of the Visayas (UV) aron makatigom og salapi nga itabang ngadto pamilya sa Sugbuanong boksidor Z 'The Dream' Gorres.

Si Cebu First District Representative ug UV President Eduardo 'Eddiegul' R. Gullas ug igsuon nga si Jose 'Dodong' R.Gullas mihatag na'g P10,000 matag usa kanila alang sa medical expenses ni Gorres.

Si Dodong Gullas, nagkanayon nga isip unibersidad ug nailhan nga matinabangon sa mga nanginahanglan, angay lang sila nga mohatag sa ilang ginagmay'ng ayuda ngadto ni Gorres, kinsa tinun-an sa UV kaniadto. 

Si Gorres nikuha og kursong BS Computer Science, apan niundang kini sa ikaduha niyang tuig aron hatagan og atensiyon ang iyang karera sa boksing.

Si Gullas miawhag sa tanang UV administrators, alumni, faculty ug estudyante nga mohatag sa ilang kinasing-kasing nga hinabang ngadto ni Gorres, kinsa anaa pa nagpabilin pa gihapon sa University Medical Center sa Las Vegas, Nevada na nga kondisyon human sa brain surgery.

Si Gorres nawad-an og panimuot ug natumba pipila ka gutlo human siya gideklarar nga mananaog pinaagi sa unanimous decision batok ni Colombian Luis Melendez atol sa ilang 12-round bout niadtong Nobiyembre 13 didto sa Mandalay Bay House of Blues sa Las Vegas.

Gidominar ni Gorres ang maong away, apan usa ka makabungog nga left hook gikan ni Melendez sa nanghinapos nga bahin sa 12 round maoy mipatumba kaniya.

Human mawad-i og panimuot, dali siyang gidala ngadto sa UMC aron operahan ug makuha ang blood clot sa walang bahin sa iyang utok.    (BANATNEWS)