Hoopers mipukan sa Timberwolves

CEBU, Philippines - Ang undermanned nga Hoopers squad pinangulohan ni team captain Yoli Meso mikulit sa ikaupat nilang sunod-sunod nga daog human ilang gipilde ang Timberwolves, 80-75 aron maghari sa liderato sa elimination round sa Philippine Institute of Certified Public Accountants (PICPA) basketball tournament niadtong Domingo diha sa Vicente Sotto Memorial Gym sa barangay Punta Princesa, ning dakbayan.

Giusikan sa Hoopers ang ilang 11 puntos nga labaw, 25-14, apan nakahimo gihapon kini paglabaw sa halftime sa giya nilang Andre Tocao ug Julius Makinano. Hinay-hinay nga mikamang ang Timberwolves sa third period aron pahakan ang biya ngadto sa siyete puntos, 56-63 sa katapusang 10 minutos sa duwa.

Sa paningkamot nilang Oliver Ching ug Ronald Apawan, nailog sa Timberwolves ang labaw sa katapusang 3:34 sa iskor nga 71-70. Apan wala makalahutay ang Timberwolves hinungdan nga miyukbo kini ngadto sa Hoopers.  

 Si Tocao maoy nangu sa Hoopers sa iyang 25 puntos samtang si Lito Ortiz midugang og 22 puntos.

Si Ching miburak og 28 puntos aron pangulohan ang Timberwolves, samtang si Apawan mi-iskor og 18 puntos.

Sa laing duwa, ang Warriors mikulit sab og daog batok sa Aboitiz Power sa usa ka low-scoring ballgame sa iskor nga 47-34.

Sila si Derek Vivares ug Arnel Patatag parehong mipupo og 12 puntos alang sa Warriors, samtang sila si Erwin Enguerra mao sab ang nangulo sa Aboitiz Power sa iyang 12 puntos, gisundan ni Ritchie Lim nga miabuno og 10 puntos

PUNTOS MATAG USA

Unang duwa:

Hoopers (80) - Tocao 25, Ortiz 22, Makinano 18, Meso 11, Veltran 4

Timberwolves (75) - Ching 28, Apawan 18, Entica 16, Catipay 6, Huyoa 4, Tanupan 3

Ikaduhang duwa:

Warriors (47) - Vivares 12, Patatag 12, Delica 6, Destriza 5, Avenido 4, Ocupe 3, Acadillo 3, Lim 2

Aboitiz (34) - Enguerra12, Lim 10, Alegrado 6, Dayap 2, Carbajose 2, Delos Santos 2    (BANATNEWS)