Nadado miluwas sa MRS Tigers sa 2009 LLBA Christmas League

CEBU, Philippines - Giluwas ni Billy Nadado ang MRS Tigers gikan sa mga kamot sa i3 Racing pinaagi sa paghungit og duha ka free throws sa nahabiling 15 segundos sa final period, 57-56 sa Lapu-Lapu Basketball Association (LLBA) Christmas League 2009 didto sa Villas Magallanes Gym sa Sta. Lucia Property sa Brgy. Basak dakbayan sa Lapu-Lapu.

Gidominar sa Tigers ang unang duha ka kuwarter ug miposte kini'g otso puntos nga bentaha sa halftime, 32-24. Apan ang i3 Racing miratsada sa third quarter luyo sa mga paningkamot nilang Ondo Cadungog ug Dandan Ramos aron ilogon ang labaw, 45-41 paghuman sa maong kuwarter.

Sa final period, mipakita og maayong labok ang duha ka kampo ug nagsinukliay og mga puntos hangtod nga nailog og balik sa Tigers ang momentum.

Naglawig na unta sa kadaugan ang i3 Racing dihang miabante kini og uno punto, 56-55, apan si Nadado gi-foul ni Ramos sa nahabiling 15 segundos nga maoy naghatod kaniya ngadto sa free throw line. Ang duha ka free throws nga napasulod ni Nadado maoy miselyo sa kadaugan sa Tigers ni Tigre Inot.

Si Warren Congsuco nga maoy bugtong nakakuha og double figures alang sa Tigers mi-iskor og 20 puntos,samtang si Nadado mikambiya og singko puntos ug ang ilang playing coach nga si Archie Ompad igo lang mitusak og tres puntos.

Ang pilderong i3 Racing ni team owner Dandan Ramos, gipangulohan ni Ondo Cadungog, kinsa mirehistro og 14 puntos, gisundan ni Ramos nga adunay 11 puntos, samtang si Mario Bancale mitimang og otso puntos.

Sa laing aksiyon, ang All Box Package Corp. ni team owner ug ex-PBA Jun Tan naka-eskapo sab sa Boyla Hotel ni team owner Tonton Gilig, 64-63 sa kulbahinam nilang duwa.

Si Michael Quijano mikulit og 14 puntos aron pangulohan ang All Box, samtang si Dondon Sevilla mihirit og 13 puntos. Ang Boyla Hotel gipangulohan sab ni Ibasco, kinsa mikimada og 18 puntos, sila si Paulo Villamor ug Jun Medina nagkumboya og 27 puntos.

Ang AJY Bong ni commissioner Allan Yu, mirehistro og 74-64 nga kadaugan batok sa VKK ni team owner Victor Malingin.

Lima ka players nga gipangulohan ni Jun Acuña ang nakakuha og double figures alang sa AJY. Si Acuña miratsada og 14 puntos, gisundan ni Yu sa iyang 12 puntos, samtang si Celso Igot adunay 11 puntos si Joel Ochea mihirit og 10 puntos.

Ang naparot nga VKK gipangulohan ni Noli Paquibot, kinsa mibahog og 20 puntos, samtang si Ervin Dorig miabuno og 13 puntos.

Ang maong kompetisyon gipaluyohan ni Lapu-Lapu City Mayor Arturo Radaza, Mactan Brgy. Capt. Paz Radaza, Harry Radaza, Atty. Rico Amores, LLBA Jem Sportswear, Jun Tan ug Boyla Hotel.

PUNTOS MATAG USA

Unang duwa:

MRS TIGERS (57) - Congsuco 20, Casio 7, Amot 7, Nadado 5, Guido 4, Tan 4, Inot 3, Gilig 3, Ompad 3, Amores 2

i3 RACING (56) - Cadungog 14, Ramos 11, Bancale 8, Luayon 6, Densi 5, Igot 3, Francisco 2, Orque 2, Oyao 2, Espinosa 2

Ikaduhang duwa:

ALL BOX (64) - Quijano 14, Sevilla 13, Eyas 9, Edig 5, Aying 4, Amodia 3, Lungay 3, Aselom 3

BOYLA (63) - Ibasco 18, Villamor 14, Medina 13, Tampus 4, Gilig 4, Daluz 2, Hiyas 2, Temporada 2

Ikatulong duwa:

AJY BONG (74) -- Acuña 14, Yu 12, C. Igot C. 11, Ochea 10, Bardugo 9, Tampus 8, D. Igot 8, Labdan 6, Cosep 2, Daño 2   (BANATNEWS)