CEBU, Philippines - Subhan sa dili madugay ang bag-ong natukod nga Cebu Golden Basketball League (CGBL), usa ka grupo sa mga mahiligon sa duwang basketball kadaghanan kanila mga professionals nga nagpangedaron og labing menos 50 anyos, mosikad na unya sa Disyembre 5 alang sa ilang inaugural season diin pitoka teams ang mosalmot didto sa Inayawan Sports Complex.
Ang CGBL gitukod ni Atty. Flor Yosores kinsa konektado sa Coca-Cola Bottling Company, Inc. ug maoy magsilbing adviser sa grupo.
Mga representante sa pito ka teams ang mitambong sa press conference sa miaging adlaw didto sa Baseline Restaurant aron hisgotan ang tournament format ug uban pang mga detalye atol sa opening ceremony.
Ang mosalmot mao ang host Power Forty Basketball Club gikan sa Inayawan, Naga Above Forty Basketball Association (NAFBA), Minglanilla Basketball Association (MIBA), Los Amigos Basketball Association (LABA) gikan sa Banilad, Mandaue City, Better-Run Basketball Association (BRBA), Danao Rubystar Basketball Association (DARUSBA) ug ang labing karaan nga gupo sa mga dribbing professionals nga mao ang Cebu Professionals Basketball Association (CEPBA).
Si Atty. Yosores malaumon nga mosalmot ang Talisay Basketball Association (TBA) ni konsehal Rudy Cabigas sunod tuig aron mahimo nang walo ang opisyal nga original members ug sa higayon nga mahimo nang sakop sa CGBL ang TBA, ila dayong ipatuman ang home-and-away format aron paghatag og dugang bulok ug kasadya sa maong lega.
Ang gitudlong commissioner sa CGBL mao ang Cebu Schools Athletic Foundation, Inc. (CESAFI) referee nga si Edwin Dejacto.
Ang Power Forty girepresentahan ni magpapatigayon Romy Rama, ang team owner sa Amihan Bags ug team manager sa Park ‘N Go Bakeshop, ang mitambong alang sa NAFBA mao sila si Normie Fanilag ug Edgar Flores, si Konsehal Cording Mejia alang sa MIBA, si kanhi coach ug CESAFI deputy commissioner Danny Duran moy mirepresentar alang sa BRBA, si Cesar Lee alang sa LABA, sila si Boy Almagro ug Dennis Batac alang sa DARUSBA ug si Cesar Ortega alang sa CEPBA isip representante nila ni Dr. Dennis Villamor, ang presidente sa CEPBA ug si bise-presidente Gilbert Gajudo.
Ang tournament format single round robin ug ang top two teams awtomatik moabante sa semifinals. Usa lang ka team ang tagakon ug ang laing upat ka mga survivors mag-abot sa playoffs diin ang no. 3 ug no. 4 teams adunay twice-to-beat advantage batok sa no 5 ug no. 6.
Ang champion sa maong torneyo makadawat ug 15 mil pesos, ang second placer 7,500 mil pesos ug ang third placer mobulksa ug 5, 000 pesos.
Ang tanang teams gi-awhag sa pagdala sa ilang labing maanyag nga muse atol sa opening day ug ang pairings himoon piunaagi sa bunotay didto sa sulod sa gym ug dayon ipanghatag ang opisyal nga skedyul sa tanang duwa. - Gabby G. Malagar (BANAT NEWS)