Cebu, Mis.Or inilog sa liga superleg

CEBU, Philippines - Duha ka koponan nga mao ang Misamis Oriental Meteors ug M.Lhuillier Kwarta Padala-Cebu Niños ang subling mubuhi sa ilang panagribal sa pagsikad sa Super Leg sa Smart Liga Pilipinas Conference III karong adlawa diha sa Cebu Coliseum.

Ang undefeated nga Cebu Niños ni team owner Michel J. Lhuillier ug coach Yayoy Alcoseba ug ang defending champion nga Meteros ni Gov.Oscar S. Moreno ug coach Jun Noel maningkamot karon nga modaug batok sa laing tulo ka koponan alang sa ikatulong kampiyonato sa numero unong community-based nga liga sa nasud.

Sa usa ka press conference nga gipahigayun kagahapon didto sa Regency Hotel Tower 1, si Noel nagkanayon nga bisan paman sa daghang kakulian nga naagian sa ilang koponan atol sa elimination, masaligon gihapon sila nga makapakita sila og nindot nga duwa paingun ngadto sa finals.

Hinuon, sa ilang bahin ang Niños nga milampos pagharus sa upat ka legs og mitali og perpektong 16-0 rekord, tinguha karon nga mabalik sa ilang kamot ang kampiyonato nga una nilang gikuptan sa unang conference sa Liga Pilipinas.

Ang Niños nga gibitoonan sa Conference I MVP nga si Marlon Basco, beteranong si Stephen Padilla, Marlon Basco ug Bruce Dacia uban sa mga bag-ong nadugang nga sila si Marlito Escobal, Mark Magsumbol ug ang kanhi South Western University (SWU) Cobras nga si Eluid Poligrates.

Gawas sa Niños ug Meteors, makigtigi usab ang laing tulo ka lig-on nga koponan kinsa makig-inilugay sa titulo sa pito ka adlaw nga torneyo, kini naglakip sa Pampanga Smart-Buddies ni coach Allan C. Gregorio, Quezon City Red-Oilers ni coach Mark Bunyi ug Laguna Trace Stallions ni coach Nomar Isla. - Lemuel P. Maglinte (BANAT NEWS)