CEBU, Philippines - Ang University of Southern Philippines Foundation (USPF) belles mikulit sa una nilang daog human nila gipilde ang University of San Carlos (USC) sa 1st Sinulog Jiboren’s Cup Volleyball Open niadtong Domingo diha sa Pasil Sports Complex, ning siyudad.
Apan ang USPF ni coach Jordan Paca gisigingsiging ug nangayo pa og dugang usa ka set sa wala pa nila angkona ang kulbahinam nga kadaugan, 25-20, 23-25, 25-20.
Ang Nestea beach volleyball national women's champions Erika Camille Verano ug Apple Saraum mipakita sa ilang nag-aso-aso nga opensa aron angkonon ang unang set, 25-20. Wala sab hinuon magpa-alkanse ang pambato sa USC nga sila si Methosheenah Bate, Niña Irish Cortes, El Margie Montejo ug Jerymie Montalvo mipakita sab sa ilang katakus aron dag-on ang ikaduhang set, 25-23.
Sa deciding set, ang duha ka kampo nagpuli-puli na og dominar sa duwa, apan nahutdan sa kusog ang USC human magtabla, 18-all, nga naghatag og kahigayonan sa USPF pagkontrolar sa duwa hangtod na sa pagsakmit sa daog.
Sa men’s bracket, ang JPC All Stars mitumba sa Saiha Dragons, 19-25, 25-19, 25-19 luyo sa mapintas nga atake ni Nestea Beach Volley national men’s champions, Ariel Carumba ug Loujei Tipgos.
Ang Dindo Salon X-clusivz, mipukan sab sa USPF, 25-17, 26-24, pinaagi sa mga paningkamot ni RP Team member Jonrey Sasing.
Sa laing bahin, ang host, Pasil Selection mipakaging sa Airforce Mactan, 25-19, 25-22.
Ang 1st Sinulog Jiboren’s Cup Volleyball Open, usa sa mga highlights sa kapistahan sa Brgy. Pasil halad alang sa Balaang Bata, Señor Sto. Niño karong Enero. – BANAT NEWS