PBA Legends, Niños nagtabla

CEBU, Philippines - Nagtabla ang PBA Legends ug ang M. Lhuillier Kwarta Padala-Cebu Niños, 80-all atol sa ilang goodwill game niadtong Lunes sa gabii diha sa Cebu Coliseum.

Ang giilang 'Aerial Voyager' nga si Vergel Meneses mipakita gihapon sa iyang kalutaw ug mi-iskor kini'g 14 puntos, lakip na ang iyang three-point play nga maoy mihatag og tres puntos nga labaw sa PBA Legends sa nahabiling 56 segundos sa duwa.

Wala usab magpabitin sila si Alvin Patrimonio ug Jerry Codiñera nga mikumbati sa ilawom nga bahin batok sa mas batan-ong Niños. Si Patrimonio mitampo og 13 puntos, samtang si Codiñera miamot og otso puntos.

 Ang head coach sa nine-time CESAFI champion University of the Visayas (UV) Green Lancers nga si Elmer 'Boy' Cabahug ug Ronnie Magsanoc mipakita sab sa ilang kahait sa three-point line. Hinuon, gigamit ni M. Lhuillier ni coach Raul 'Yayoy' D. Alcoseba ang ilang pabor sa gipaspason aron tukoron ang otso puntos nga labaw sa tunga-tungang bahin sa final period, 72-64. Apan ang PBA Legends milusad og 16-3 rally aron ilogon ang labaw.

Ang lay-up ni Mark Ababon maoy mikibhang sa labaw sa PBA Legends ngadto na lang sa uno punto, 80-79.

Ang usa sa duha ka free throws nga napasulod ni Ababon sa nahabiling nuybe segundos maoy nakatabla sa duwa, 80-all.

PUNTOS MATAG USA

M. Lhuillier (80) – Dacia 20, Saladaga 14, Ababon 13, Basco 11, Santos 10, Nailon 4, Padilla 3, Poligrates 3, Mepaña 2

PBA Legends (80) - Meneses 14, Sta. Maria 14, Patrimonio 13, Magsanoc 8, Hawkins 8, Codiñera 8, Cabahug 6, Evangelista 4   (BANATNEWS)