CEBU, Philippines - Gituhog sa Mang Inasal ni Carlos Porras ang JS Contractors ni team owner Sherwin Lequit pinaagi sa pag-iskor og 102-86 nga demolisyon kaniadtong Biyerens alang sa ilang ika-upat nga daog sulod sa pito ka duwa ug milandig sa ikatulong pwoesto sa pagtapos sa elimination round sa Punta Princesa Ball Club (PPBC) 2009 Vice-Mayor Mike Rama Cup didto sa Vicente Sotto Memorial Gym sa barangay Punta Princesa, ning dakbayan.
Ang Mang Inasal daan nang naglabaw ug diyes puntos, 51-41 sa halftime pinaagi sa pagkumboya nilang ex-pro Lou Regidor, Richie Garcia ug team Porras.
Gitiwasan sa Mang Inasal paglitson ang JS Contractors didto na sa second half aron pagselyado sa 16 puntos nga kadaogan.
Wala'y nakapiog ni Regidor kinsa mihipos og 28 puntos ug kadaghanan ninii mga fastbreak points aron pangulohan ang Mang Inasal ug mihakot si Glen Besanes ug 22 puntos samtang sila si Porras ug Garcia mi-iskor og 16 og 14 puntos matag usa.
Ang kanhi USC Warrior nga si Bong Eleazar maoy nangu sa JS Contractors sa iyang 23 puntos ug si Reginal Taborada miamot ug 22 puntos.
Sa usa ka friendly match, gilampurnas sa Ave Maria Sanctuary Park nga gipangulohan ni USJ-R Jaguars coach Edito Salacut batok sa PPBC All Star, 118-70.
Nagbahis pag-ayo ang Ave Maria diin unom sa ilang players ang mitapos og double figures pinagulohan ni ex-pro ug Baby Jaguars coach Marlon Pido kinsa misakiyo og 15 puntos. Laing mi-iskor uog double figures mao sila si Aldrin Ocañada kinsa may 14 puntos, Loedi Garcia sa iyang 13 puntos, Edward Buhay 12 puntos ug sila si Eliezer Saramosing ug Ope Abellana sa ilang 11 ug 10 puntos.
Si Robert Abasolo maoy nangu sa PPBC All Star sa iyang 17 puntos samtang parehong may 10 puntos sila si Lito Navarro ug Junard Ciabo. - Gabby G. Malagar (BANAT NEWS)