Pacquiao pabiling mapahiubsanon

CEBU, Philippines - Wa panumbalinga ni Manny Pacquiao ang pagtandi kaniya ngadto sa mga all time greats sa natad sa boksing, tungod kay alang kaniya usa lamang siya ka ordinaryo apan kugihan nga boksidor. Si Pacquiao kinsa, giila karon nga best pound-for-pound boxer sa tibuok kalibutan, nagkanayon nga usa sa iyang mga sekreto sa iyang sunod-sunod nga kalampusan mao ang hugot niyang konsentrasyon ug dedikasyon sa pamuksing.

Matud pa ni Pacquiao nga giisip niya ang iyang kaugalingon nga ordinaryo nga boksidor bisan paman sa gipakita niyang pagka-dominante dihang iyang gipukan si Miguel Cotto kagahapon aron masakmit ang WBO welterweight title nga maoy naghimo niya nga labing unang boksidor sa kasaysayan nga makaangkon og pito ka world title sa managlahing timbang.

Si Top Rank Inc. Big Boss Bob Arum namahayag human sa away nga malakip na ang ngalan ni Pacquiao sa mga legendary boxers sama nila ni Muhammad Ali, Marvin Hagler ug Sugar Rey Leonard.

Hinuon, si Pacquiao nagkanayon nga wala niya gikompara ang iyang kalampusan ngadto sa mga naabot nila ni Ali ug Leonard.

Sa iyang bahin, si Freddie Roach mihulagway usab ni Pacquiao nga labing ngilngig nga boksidor sa iyang panahon karon ug lisud nang hitupngan ang nahimong kalampusan sa iyang boksidor.

Atol sa post-fight news conference diin giputos sa bandage ang iyang ulo tungod sa pagkahubas sa dugo sa iyang dunggan, si Pacquiao mi-asuy nga naningkamot siya nga makigsinukliay og kinumo human mangangkon ang kampo sa Puerto Rican nga maglisud siya batok sa mas dako nga si Cotto.

Dugang pa ni Pacquiao nga nagmaya siya sa nindot niyang gipakita karong tuiga diin nisaka siya ibabaw sa ring sa makatulo ka higayun.

Karon nga napilde na nila si Cotto, laraw karon ni Roach nga hingpit nga pandayon ang ngalan ni Pacquiao isip labing kusgan sa tanang boksidor pinaagi sa paghagit sa undefeated American nga si Floyd Mayweather Jr. alang sa sunod away ni Pacquiao. (Ug gikan sa AP)