Gullas Cup '09 sugdan na

CEBU, Philippines - Andam na ang three-time champion Talisay nga modepensa ilang titulo sa Gullas Cup basketball (men) and volleyball (men & women) tournaments nga mosikad karong adlawa didto sa Carcar Sports Complex.

Usa ka caravan ang pagahimuon nga manukad diha sa Talisay City paingon ngadto sa Sibonga ug balik sa Carcar diin adto ipahigayon ang opening ceremony sa alas-2 sa hapon.

Ang maong torneyo naglangkub sa men’s basketball (22 yrs.old and below), volleyball men’s

ug volleyball women’s categories.

Si tournament director Sam-Sam Gullas nagkanayon nga tumong sa maong torneyo mao ang pagkaplag og mga bag-ong talento ug mga potensiyal nga basketball ug volleyball aspirants aron hatagan sila og kahigayonan nga makaduwa isip varsity ngadto sa nagkadaiyang unibersidad ug kolehiyo dinhi sa Sugbu.

Sa iyang bahin, si Talisay City Councilor Rodi Cabigas, kinsa mao usab ang commissioner on basketball, nagkanayon nga dakung hagit ang atubangon karon sa Talisay batok sa uban pang lig-on nga koponan nga nagtinguha pag-ilog sa ilang korona.

Gawas sa Talisay, angay sab nga atngan ang duwa sa Minglanilla kay moparada kini og 6-foot-6 Fil-Am player.

Hinuon, si San Fernando Mayor Lakambini Reluya mipasidaan nga dili basta-basta ang ilang line-up karong tuiga ug ilang ipabuhagay kutob sa ilang mahimo aron ilang mailog ang titulo.

Ganting salapi ug tropeyo ang madawat sa top-3 winners. Ang kampiyon mobulsa og P30,000, ang first runner-up makaangkon og P25,000 ug ang second runner-up makadawat og P20,000.

Ang third runner-up gantihan og P15,000 ug adunay consolation prize nga P10,000.   (BANATNEWS)