Park N' Go Bakeshop mihaon og daog sa TBA

CEBU, Philippines - Mihaon og daog ang Park 'N Go Bakeshop batok sa Nike, 59-58 sa pagsugod sa tinuig nga Talisay Basketball Association (TBA) niadtong Domingo didto sa Talisay City Sports Complex.

Sila si Romy Rama, Danny Lisondra ug ang beteranong si Michael Arias nagkumboya aron pangulohan ang Park 'N Go ni team owner Romy Rama.

Sa laing duwa, midaog sab ang Shark human nila gilamoy ang iMarlins sa iskor nga 81-73 sa Legends Category, gitumba sab sa Wolves ang Jaguars, 84-76 ug ang Lions mipakita sab sa ilang kabangis dihang ilang gilupig ang Tigers, 66-62 sa mga aksiyon sa group C.

Sa group B, ang Adidas miposte og daog pinaagi sa paglubong sa Asics sa iskor nga 74-56.

Sa laing bahin, mitambong sa opening ceremonies mao si Talisay ABC President Osmundo Manreal ug si RTC Judge Nonoy Seville.

Ang TBA nga gidumala ni commissioner Boy Filosopo duwaon matag Domingo didto sa Talisay City Sports Complex. – BANAT NEWS