Espada, Tabucal nanghari

CEBU, Philippines - Mipakita sa talagsaon nilang abilidad sa skimboarding sila si Brando Espada ug Weng-weng Tabucal aron dominahon ang tagsa-tagsa nila ka dibisyon sa gipahigayong 1st Aznar Skimfest niadtong miaging adlaw didto sa Aznar Beach sa Brgy. Poblacion sa dakbayan sa Talisay.

Ang taga-Leyte nga si Espada maoy nanghawod sa men’s open category, samtang ang garbo sa Pook, Talisay nga si Tabucal mao usab ang misakmit sa titulo sa women’s open category.

Nagsunod ni Espada mao sila si Arjun Jimenez ug Dags Hermosa nga mi-okupar sa ikaduha ug ikatulong dapit, samtang si Leo Espada maoy mikapyot sa ikaupat nga dapit.

Sa pikas bahin, si Payen Wapili maoy mipahiluna sa ikaduha nga dapit sa women's division, samtang sila si Kara Marbe ug Shan Marie Dacela maoy third ug fourth placers. 

Ang mga kampiyon mibulsa og P3,000, ang second placers nakadawat og P2,000 ug ang third placers nakaangkon og P1,000.

Ang maong torneyo gipasiugdahan ni Poblacion barangay councilor Richard Francis 'Choy' Aznar. – BANAT NEWS