UC abante sa "SWEET 16"

CEBU, Philippines - Milampos ang Cebu Schools Athletic Foundation, Inc. (CESAFI) finalist University of Cebu (UC) Webmasters sa ilang tinguha nga mo-abante sa top three karon nga season dihang ilang gidemolis ang University of San Jose Recoletos (USJR) Jaguars, 103-86, alang sa luna sa Sweet 16 sa Philippine Collegiate Championship League (PCCL) zonal elimination nga natapos kagabii didto sa Cebu Coliseum. Sa maong kadaugan, nakabangun ang Webmasters human sila gipakauwawan sa National Athletic Association for School Colleges and Universities champions San Sebastian College de Cavite Recoletos (SSC) Baycats, 74-66, samtang ang Jaguars natangtang sa torneyo, dala ang 0-3 win-loss record.

Sama sa gihapon, ang 6-foot-11 nga sentro nga si June Mar Fajardo maoy nibahug alang sa Webmasters human siya mibubo og 26 puntos, apan ang niluwas sa UC mao ang point-guard nga si Kelvin Juliane kinsa mipusa usab og 26 puntos diin 22 niini gikan sa first half lakip na ang upat ka triples sa unang kuwarter.

Si Robinson Mohamad midunol usab og 16 puntos, samtang si Kevin Quilantang miamot usab og 10 puntos alang sa Webmasters.

Ang Webmasters mo-uban karon sa nine-time CESAFI champion University of the Visayas (UV) Green Lancers ug University of San Carlos (USC) Warriors nga moabante sa quarterfinals didto sa Bacolod.

Sa ilang bahin, ang pilderong Jaguars gipangulohan ni Edmar Pateño ug Abulaiz Suliman kinsa mitali og 12 puntos, samtang si Marvin Duran mikaskas og 11 puntos.

Lakip sa misaksi sa maong duwa mao ang PCCL organizer nga si Jose Lipa.

Puntos matag usa :

UC (103)- Fajardo 26, Juliane 26, Mohamad 16, Quilantang 10, Abella 8, Cayanong 5, Luceño 4, Tano 3, Bernil 2, Miranda 2, Gomez 1

USJR (86)- Pateño 12, Suliman 12, Duran 11, Bibera 9, Lapiz 9, Dela Peña 7, Amores 7, Villaver 7, Dela Rama 3, Albarillo 2, Nudalo 2, Alquizola 1. -  BANAT NEWS