CEBU, Philippines - Agi'g pagsaulog sa ika-75 nga anibersariyo sa Archdiocese sa Sugbu, ang Cebu Archdiocesan Major Seminary Foundation Inc. (CAMSFI) milusad sa ilang 4th edition sa Seminary Fun Run karong Nobiyembre 29 diha sa Sumilon Road sa Cebu Business Park.
Ang lumba adunay tulo ka kategoriya -- 3K Open, 5K (Open), 5K (priests/seminarians) ug 10K Open.
Sa gipahigayong press conference kagahapon diha sa Seminario Mayor de San Carlos (SMSC), si Rt. Msgr Guillermo Gorre, presidente sa CAMFSI nagkanayon nga lahi sa ubang lumba, ang ilang Fun Run wala nila giisip nga usa ka commercial run, apan tumong nila ang paghatag og bili sa kapiskay sa lawas pinaagi sa pagdagan nga usa karon ka popular nga sports dinhi sa Sugbu.
Gipahibalo usab sa mga organizers, nga tumong usab sa maong Fun Run mao nga makatigom og salapi nga itabang ngadto sa mga estudyante alang sa pagpalambo sa computer system sa seminaryo.
Niadtong buot mosalmot mahimong magparehistro sa Cebu City Sports Complex ug sa SMSC. Aduna kini registration fee P150 matag entrante. – BANAT NEWS