CEBU, Philippines - Nasakmit sa ART squad ni team owner Art Arellano ang liderato human nila tadtara ang Mang Inasal, 91-85 sa 1st Punta Princesa Ball Club (PPBC) 2009 Vice Mayor Mike Rama Cup niadtong Biyernes diha sa Vicente Sotto Memorial Gym sa barangay Punta Princesa, ning dakbayan.
Ang ART dribblers sayo kaayong nanginit ug miposte og 28-12 nga abante sa first period sa giya nilang Junel Villarosa ug Ronald Libre.
Ang ART miposte sa daku nilang labaw nga 23 puntos sa iskor nga 53-30 sa halftime.
Padayon nakontrolar ART ang ilang double digits nga labaw sa fourth period, 75-60 ug wala na nila hatagi og laing higayon nga makasikit pag-ayo ang ilang kaatbang sukad niadto.
Si Rowel Sumalinog maoy nangulo sa ART pinaagi sa iyang 16 puntos, samtang sila si Villarosa ug Keith Arellano nagkumboya og 27 puntos alang sa ilang ikaupat nga daog sud sa lima ka duwa.
Ang Mang Inasal gipangulohan ni Glen Besanes, kinsa mikulit og 20 puntos, gisundan ni Chito Hernandez sa iyang 17 puntos. Ang team owner sa Mang Inasal nga si Carlos Porras miabuno og 16 puntos.
Sa laing duwa, gipukan sab sa Cebu Unique Trade ang JS Contractors sa iskor nga 90-86 aron paglansang sa ilang ikatulong daog sulod sa unom ka duwa.
Si Louie Navarro mipabuto og 22 puntos aron pangulohan ang Traders, samtang si Rolly Catubig mitampo og 16 puntos.
Nangulo sa pilderong Contractors mao si Reginald Taborada, kinsa mibugha og 25 puntos, gisundan ni Mat Vallejo nga adunay 18 puntos ug Titing Pillotas nga miamot og 14 puntos.
PUNTOS MATAG USA
Unang duwa:
Unique Trade (90) - L. Navarro 22, Catubig 16, Sausa 8, Faunillas 8, Libre 7, Sullano 6, Batoon 6, B. Navarro 6, Navasquez 4, Tiu 4, Ibona 3
Contractors (86) - Taborada 25, Vallejo 18, Pillotas 14, S. Lequit 11, Viñalon 6, Lequit 5, Tecson 2 Canencia 2, Caburnay 2, Cabunillas 1
Ikaduhang duwa:
ART (91) - Sumalinog 16, Villarosa 14, K. Arellano 13, A. Arellano 11, Libre 10, N. Arias 7, Rojas 6, R. Arias 5, Soco 4, Vilbar 3, Navarro 2
Mang Inasal (85) - Besanes 20, Hernandez 17, Porras 16, Peña 11, Chiong 8, Flores 4, Caminade 4, Dela Peña 3, Jumawan 2 (BANATNEWS)