Cavs midaog na sab

CEBU, Philippines - Nakasagunson og daog ang Cleveland Cavaliers human sab sa ilang sunod-sunod nga duha ka pilde dihang ilang gipukan ang Charlotte Bobcats kagahapon sa iskor, 90-79 sa nagpadayong 2009-2010 NBA season didto sa ilang korte sa Quicken Loans Arena sa Cleveland, Ohio.

Sa laing duwa, milanat una og lima ka minutos nga overtime sa wala pa modaog ang Philadelphia Sixers batok sa New York Knicks sa usa ka high-scrong ballgame, 141-127.

Igo lang mi-iskor og 14 puntos si LeBron James apan si Mo Williams maoy nangu sa Cavs sa iyang 24 puntos ug laing tulo ka kauban ang mi-iksor og double figures lakip ang higanteng si Shaquille O’Neal.

Ang Yugoslavian nga si Vladimir Radmanovic mi-iskor og 12 puntos alang sa Bobcats.

Didto sa Madison Square Garden sa New York City, si Andre Iguodala mibahug og 32 puntos ug tulo ka kauban mihakot og labing menos 20 puntos—Louis Williams 27 puntos, Thaddeus Young 25 puntos ug Marreese Speights 20 puntos.

Mas dako unta og nahagdaw si Al Harrington sa Knicks sa iyang 42 puntos ug ang Italian nga si Danilo Gallinari midugang og 30 puntos apan gagmay na og puntos ang nagsunod kanila.

Sa laing duwa, midaog na sab ang Washington Wizards nga gipangulohan ni Gilbert Arenas batok sa New Jersey Nets, 123-104, na-upset sa Milwaukee Bucks ang Detroit Pistons, 96-85, gilubong sa San Antonio Spurs ang Sacramento Kings, 113-94, midaog ang Houston Rockets batok sa Portland Trail Blazers, 111-107 ug midaog ang Dallas Mavericks batok sa Los Angeles Clippers, 93-83. - NBA.com (BANAT NEWS)