Lucky Nine

CEBU, Philippines - Sa duwa sa baraha, adunay gitawag og Black Jack ug aduna sa’y Lucky 9.

Dinha sa Cebu Schools Athletic Foundation, Inc. (CESAFI) adunay Lucky 9 ug mahimong sunod tuig Perfect 10 (gymnastics scoring) ug kini walay lain ang inila ug bantugan nga UV Green Lancers.

Siyam na ka tuig ang milabay sa CESAFI ug siyam na usab ka championship trophies ang na-isa sa Lancers gikan sa tuig 2001 hangtod ning tuiga.

Niadtong Huwebes sa gabii, gipakita na sab sa Lancers ang ilang katakos ug ilang gipakita kung unsa sila ka-andam nga modepensa sa ilang korona aron dili kini mabawi sa laing team. Ilang gitapos ang best-of-five championship series batok sa University of Cebu (UC) Webmasters pinaagi sa 3-1 nga baraha human ilang gitiwas ang serye sa iskor, 75-62 atol sa Game 4 didto sa Cebu Coliseum.

Agi'g paglab-as sa mga miaging resulta sa serye, mao kini ang mga iskor gikan sa Game 1 hangtod Game 4.

Game 1 UV 64, UC 56; Game 2 UC 71 UV 70; Game 3 UV 81 UC 67 ug Game 4 UV 75 UC 62.

Apan wala mahingpit sa UV ang pagdominar sa UC tungod kay gipukan sa Junior Webmasters ang Baby Lancers sa ilang pagtigi alang sa ikatulong pwesto pinaagi sa 2-0 sweep sa secondary division. Sa Game 1 midaog ang UC juniors, 85-72 ug sa Game 2 gilat-an na gyud sa UC ang UV, 103-83. Dinhing dapita nakabawos ang UC apan mas dunay gibug-aton ang collegiate team kung itandi sa high school team.

Wala pay team nga nakasumpo sa gikusgon sa bagyo nga may codename Lancers.

Ambot og sunod tuig motumaw na ba ang team nga makapahupas sa Lancers ug kini maoy atong paaboton sunod tuig sa ika 10 nga season sa CESAFI.

* * *

Didto sa Manila, ang San Beda Red Cubs ni legendary coach Edmundo “Ato” Badolato maoy milangkat sa korona sa NCAA 8th season sa junior division human ilang gipukan ang Letran Squires sa iskor, 86-75 didto sa The Arena sa San Juan, Metro Manila kaniadto gihapon Huwebes sa hapon pipila lang ka oras sa wala pa mahimong kampiyon ang Green Lancers.

Mao kadto’y ika-17 nga korona sa Red Cubs sa kasaysayan sa NCAA ug 16 niini ang gisakmit ni Badolato kinsa mipahibalo na sa iyang pagretiro human sa duwa. Nagserbisyo si coach Ato ug 37 ka tuig isip coach sa San Beda apan ang kadaghanan niini didto niya ibubo sa high school division.

Tungod sa kadugay ni coach Ato sa Red Cubs, ang anak sa iyang player kaniadto iya sab nahimong player karon ug usa sa dako’g natabang sa kampiyonato ug siya mao si Alfonso Gotladera. Ang nahimong MVP mao ang produkto gikan sa Holy Cross Academy sa Davao nga mao ang ilang point guard nga si Baser Amir.

Kung wala pa masayod ang uban, si coach Ato maoy nag-umol kanilang Benjie Paras, Ronnie Magsanoc, Eric Altamirano, Ato Morano ug Boybits Victoria ug uban pang mga kadungan niya sa Red Cubs.

Paglabay sab sa pipila ka katuigan, siya sab ang nag-umol kanilang JV Casio, Tyronne Bautista, ug Michael Bravo. Bag-ohay lang niyang gipadala sa PBA sila si Yosief Aljamal ug Ogie Menor. Sa laktud pagkasulti, hapit matag upat ka tuig magpadala siya og players alang sa pro.

Karon sa iyang kiliran nga usa sab ka true-blooded Bedan mao ang atong higalang Sugboanon nga si Britt Carlo Reroma, ang dugay na kaayong nag-alagad isip assistant coach ni Ato.

Matud pa ni Ato iya nang girekomendar si Reroma nga maoy mosunod coach sa Red Cubs ug desisyon na lang sa mga kadagkoan sa San Beda ang gihuwat apan malaumon si coach Ato nga si Reroma na gyud.

Sumala pa sa Philstar sports, “I’ll recommend Britt Reroma but there’s no school decision yet, it’s probably him.”

Atong panghinaut nga si Britt na gyud aron ato siyang ikapasigarbo.

Good luck Britt.

SG Miscellaneous. Belated birthday greetings last October 20 to FYA officer Noel Medalle of barangay Punta Princesa. There are two major basketball events this week from November 5-8 to be held separately at the USC Gym and the Cebu Coliseum. First—the 2nd Nokia RP Youth Invitational Basketball Championships and the Philippine Collegiate Champions League (PCCL) zonal eliminations. Good luck RP Team, UC Webmasters and USJR Jaguars and good luck to the organizers Mr. Rady Abarintos, president of the Rotary Club of Cebu Fuente and to Mr. Felix O. Tiukinhoy, Jr., commissioner of the CESAFI. - BANAT NEWS