CEBU, Philippines - Buksan na usab ang laing season sa Cebu City Dancesport and Hiphop Barangay Competition karong Nobiyembre 7 diha sa Brgy. Mambaling, ning siyudad.
Ang maong competition nga giulohan usab og Go Ching Hai and Martinca Cup, abli sa tanang dancesport team gikan sa nagkadaiyang barangay dinhi sa Sugbu nga kanunay'ng misalmot sa DTCC workshop.
Ang dancesport competition gibahin ngadto sa tulo ka classes nga naglakip sa juvenile (7-11 yrs.old), juniors (12-15) ug youth (16-20) alang sa modern standarad ug latin discipline.
Sa laing bahin, ang hip-hop competition, abli sa tanang koponan nga adunay lima ngadto sa 12 ka miyembro. Ang ikaduhang season gibahin ngadto sa duha ka grupo nga mao ang North ug South District. Ang North district adunay 10 ka legs, samtang ang South district gilangkuban og walo ka legs. Ang maong event magsugod karong buwana ug mulungtad ngadto sa buwan sa Abril.
Lakip sa venue sa maong kompetisyon mao ang Tejero sa Nobiyembre 14 ug Quiot karong Nobiyembre 21, samtang ang gitakdang mo-host sa event ang Apas sa Disyembre 5, dayung tapon didto sa San Nicolas karong Disyembre 12.
Ang Hipodromo maoy mo-host sa unang sangka sa sixth leg sa sunod tuig, sundan sa Guadalupe sa Enero 23 ug Mabolo sa Enero 30. Sa Pebrero 6, ang Punta Princesa maoy sunod venue sa kompetisyon, Pahina Central sa Pebrero 20 ug Tisa karong Pebrero 27, samtang ang Buhisan ang mo-host sa Marso 13, Talamban sa Marso 20 ug Inayawan sa Marso 27.
Motapun usab didto sa Capitol Site ang maong event sa Abril 3, Pardo sa Abril 10 ug Suba sa Abril 7. Human sa tanang legs, isunod dayun ang battle of the champions alang sa mga mikampiyon sa nagkadaiyang legs.
Gawas sa tigiay sa sayaw, aduna usa’y ipahigayun nga libreng workshop nga gipasiugdahan sa Cebu City government ug Sangguniang Kabataan Federation uban sa suporta sa mga barangay officials sa mga kabarangayan sa siyudad sa Sugbu. - Lemuel P. Maglinte (BANAT NEWS)