CEBU, Philippines - Mipakita og maayong labok ang mga boksidor gikan sa Banilad Elementary School aron dominahon ang Summit Natural Drinking Water Amateur Series diha sa Gaisano Country Mall carpark sa Banilad, ning siyudad.
Sila si Jade Ian Formentera ug Ramel Castañares mihatag og duha ka daog alang sa Banilad. Si Formentera midaog sa puntos batok ni Miky Cuizon sa Cabancalan Elementary School sa 23 kgs. class, samtang si Castañares mipukan ni Ariel Sibay sa Flores Boxing Club.
Nagsunod sa Banilad mao ang FBC sa ilang 2-2 record.
Sila si Ramel Tuñacao ug Mart Kevin Serenio mao ang mihatag og daog sa FBC. Si Tuñacao nangayo lang og 58 segundos sa second round aron paundangon si Alvin Alfuro sa Sta. Cruz Stable sa 28 kgs. class, samtang si Serenio midabodabo ni Ferde San Roque sa Cabancalan sa 42 kgs. division.
Tulo ka boksidor sa Phil-Australian Boxing Club (PABC) nga sila si Jason Tuñacao, Wenceslao Gakit ug Roldan Asero parehong nangaparot ngadto sa ilang tagsa-tagsa ka kaatbang.
Si Tuñacao miluhod ngadto ni Kevin Jake Catajara sa Talamban sa ilang sangka sa 40 kgs. division, si Gakit nasugamak batok ni Zalde Aroa sa Bantayan sa 54 kgs. class ug si Assero napakyas usab pagkulit og daog human gipilde ni Robert Labanza sa Balamban sa 60 kgs. class.
Sama sa PABC, gidemalas sab ang Sta. Cruz Stable sa Talisay City dihang nangapukan sila si Marco Pumar ug JK Alvarez nilang Vicente Seos-e Jr. sa Cabancalan ug Mark Bernaldez sa Cagayan.
Hinuon, nakabingwit og daog ang Sta. Cruz dihang midaog pinaagi sa disqualification si Jovert Alvarez batok ni Joe Ebalang sa 54 kgs. division.
Ang taga-Sibonga nga si Robert Etorma mipaundang ni Benjie Tabanao sa Lapu-Lapu sulod sa 49 segundos sa second round sa 60 kgs. division, samtang si Jun-jun Sultan mipaluhod ni Joedel Talle sa Cabancalan sa 53 kgs. division. – BANAT NEWS