CEBU, Philippines - Masaksihan na karong adlawa ang kulbahinam nga aksiyon sa 14th leg sa 2009 MS Motosuit Motocross Series nga giulohan og “2nd Keiz BJ Motors Invitational Cup” didto sa Caduawan, Tabogon, Cebu.
Usa sa giatngan sa kulbahinam nga aksiyon mao ang image model sa MS Motosuit nga si Glenn ‘D King’ Aguilar, napakyas pagsalmot sa pipila ka legs tungod sa mga kakulian.
Si Aguilar bisan og usa lang ka "guest rider," gikalipay gihapon sa local riders ang iyang presensiya tungod kay aduna sila'y bag-ong tricks ug strategies nga makat-onan sa matag higayon nga moanhi siya sa Sugbu.
Gawas ni Aguilar, nga karon mipasilong sa landong sa SEL-J squad, si Keiz BJ Racing Team big boss ug event host nga si Siegfred Ornopia naglaum sa mga riders gikan sa kaulohan nga mosalmot ning maong lumba.
Ang usa ka adlaw nga lumba nga kabahin sa tinuig nga kapistahan sa ilang mahal nga patron Mother of Perpetual Help karong Oktubre 31, gipaluyohan sa Castrol Power 1, Keiz BJ Motor Parts, Sunriser Motorcycles, JIGMA Construction, Mayor Erwin Agustino, Cebu Fourth District Congressman Benhur Salimbangon. – BANAT NEWS