UV Lancers gihapon

CEBU, Philippines - Hingpit na nga nasakmit sa University of the Visayas (UV) Green Lancers ang ikasiyam nilang sunod-sunod nga korona human gilubong ang University of Cebu (UC) Webmasters, 75-62 sa Game-4 sa ilang "best-of-five" finals series sa Cebu Schools Athletic Foundation Inc. (CESAFI) men's basketball event kagabii diha sa nagsugwak nga Cebu Coliseum.

Bisan og wala kaayo makapunit og daghang puntos ang higanteng sentro nga si Gregory Slaughter, kinsa igo lang mi-iskor og sayes, wala gihapon maglisud ang UV coach Elmer 'Boy' Cabahug kay gitubos kini ni Eman Calo, kinsa miburak og 21 puntos aron pangulohan ang Green Lancers.

Sama sa iyang gibuhat sa Game-3, nagbukal-bukal gihapon ang kainit ni Calo sa Game-4 dihang mipatusak kini og tulo ka three-point shots aron hatagan ang Lancers og siyete puntos nga labaw sa first-half, 34-27.

Nahimong hait nga hinagiban sa UV Lancers mao ang ilang three-point shots diin mihimo kini og lima sa first period, duha niini gikan ni Elmer Mykiel Cabahug, duha gikan ni Harold Cincoflores ug usa gikan ni Ritchum Dennison.

Ang Lancers miposte og 20 puntos, 66-44 sa katapusang 4:03 sa final period human sa alley-op ni Calo, apan mitusik gihapon ang UC pinaagi sa ilang 15-5 rally aron pahakan ang labaw sa 10 puntos, 71-61.

Ang rookie nga si Mark Tano mipasulod og tulo ka sunod-sunod ka triples, samtang ang guwardiya nga si Kevin Juliane mihimo usab og usa ka three-point play, apan gitubag sa UV ang tanang tirada sa UC hangtod nga nahurot ang oras sa duwa.

Si Moncrief Rogado maoy topscorer alang sa UC sa iyang 12 puntos, samtang si Tano midugang og 12 puntos, apan ang sentro nga si June Mar Fajardo igo lang mihipos og siyete puntos.

Gawas ni Calo, laing miposte og double figures alang sa Green Lancers mao si Cincoflores nga mitira og 15 puntos ug si Dennision nga adunay 10 puntos.

Sila si Slaughter ug Fajardo maoy nahimong co-MVPs ug nakig-uban nila sila si Chris Victor Diputado sa UV, Rogado sa UC ug Giovanni Padillo sa USC sa Mythical Five.

Puntos matag usa:

UV (75) - Calo 21, Cincoflores 15, Dennison 10, Slaughter 6, Cabahug 6, lasala 4, Mercader 4, Olivares 4, Manigque 3, Diputado 2

UC (62) - Rogado 13, Tano 12, Juliane 9, Fajardo 7, Mohamad 7, Quilantang 5, Cayanong 4, Luceño 3   (BANATNEWS)