CEBU, Philippines - Gilat-an sa Sisters of Mary School (SMS) ang ilang silingang Immaculate Heart of Mary Academy (IHMA), 84-52 sa inaugural game sa gibanhaw nga Cebu Collegiate Athletic Association (CCAA) niadtong Domingo didto sa Minglanilla Sports Complex.
Sa laing duwa, gisubhan sab og daog ang Minglanilla-Gullas High (UV) batok sa Tungkop National High School sa iskor nga 65-64.
Miposte sab og daog ang Lipata National High School dihang ila sab nga gilubong ang Tulay National High School sa iskor nga 76-60 ug ang Minglanilla National High School midaog batok sa Lawaan National High School sa iskor nga 104-93.
Determinado kaayong modaog ang SMS tungod sa ilang dakung labaw diin miposte kini og 43-19 sa halftime.
Apan sukwahi ang nahitabo sa duwa tali sa Gullas High batok sa Tungkop nga wala gyud moyukbo sa tumang kasayon batok sa mas inila ug paboritong kaatbang.
Ang Tungkop maoy naglabaw sa first period, 22-8, apan misumbalik ang Gullas High sa halftime aron pagtali og 11 puntos nga bentaha, 35-24.
Nasakmit pagbalik sa Tungkop ang labaw sa third period, 48-42 hangtod na sa fourth quarter diin nagpuli-puli sila’g ilog sa labaw hangtod nga naka-eskapo ang Gullas High paghuman sa duwa.
Ang pagbanhaw sa CCAA nahimong posible tungod sa paningkamot ni sports patron Lorenzo 'Chao' Sy, kinsa maoy presidente sa maong grupo ug mao sab ang regional director sa Basketball Association of the Philippines (BAP) dinhi sa Central Visayas. – BANAT NEWS