Getaruelas mitapos sa ikaunom sa Mt. Kinabalu Climbathon

CEBU, Philippines -  Mihatag na usab og laing dungog sa nasud ang Sugbuanang si Leiszl Lumindas-Getaruelas human siya mipahiluna sa ikaunom nga dapit sa 23rd Mt. Kinabalu International Climbathon didto sa Mt. Kinabalu sa Sabah, Malaysia.

Bisan pa sa kakulian tungod sa kakulang sa badyet, si Getaruelas milampos pagpahiluna sa ikaunom nga dapit batok sa gatosan ka female climbers sa elite division. 

Mapasalamaton usab si Getaruelas nga bisan og wala niya makuha ang iyang target nga masulod sa top 3, milampos gihapon siya pagtapos sa lumba.

Si Getaruelas, ang aerobic instructor-runner mitaak sa Mt. Kinabalu sulod sa duha ka oras, 35 minutos ug 23 segundos ug gitapos ang makahangak nga lumba sa oras nga 3:57.02.

Gawas ni Lumindas-Gitaruelas, laing Sugbuana nga si Merlita Arias-Dunkin ang mitapos sa makutas nga lumba sa oras nga 5:51.34.

Si Arias nalandig sa ika-23 nga dapit. Sila si Lumindas-Getaruelas ug Arias-Dunkin mao ang duha sa 25 ka Pinay nga milampos paghuman sa lumba.

Hinuon, bisan pa man og gitapos na nila sa makadaghan nga higayon ang Mt. Kinabalu, sila si Lumindas-Getaruelas ug Arias-Dunkin nagtinguha gihapon nga mosalmot pag-usab sa umaabot nga katuigan hangtod nga makuha nila ang korona.

Ang duha nagtinguha nga mosalmot sa 66th Mt. Fuji Marathon sunod tuig.

Mapasalamaton sila si Getaruelas ug Arias ngadto sa Habagat, Paragon Fitness Gym, Francis Cosgrave, Tyrson Tan, Ongkinking, Cebuana Lhuillier ug Phiten nga maoy ilang major sponsors sa ilang pagsalmot sa lumba. – BANAT NEWS