CEBU, Philippines - Giharos sa Super Idols ni coach Bong Pepito ang duha ka duwa batok sa Casino Rubbing Alcohol, 65-62 aron pagsakmit sa korona sa 3rd Integrated Bar of the Philippines (IBP) basketball season diha sa Capitol Parish gym sa dalan Escario, ning siyudad.
Nagpakita og dakung kaikag ang Casino nga tablahon dihang miposte kini og 31-28 nga bentaha sa halftime luyo sa nagbagang opensa nilang Richard Bauzon, Al Limalima ug Noel Bragat.
Sa ikatulong kuwarter, ang Super Idols migamit og 1-2-2 zone defense nga gipatuman nilang Chris Abayon ug Manny Santiago nga nakapakgang sa Casino.
Ang ace playmaker nga si Ramsey Quijano maoy nagdala sa duwa sa fourth period ug maoy instrumento sa ilang rally. Apan si Benjo Santiago maoy nangulo sa Super Idols pinaagi sa iyang 20 puntos, gisundan ni Pepito nga miamot og 17 puntos, samtang si Quijano mitampo og 10 puntos.
Si Bauzon miposa og 19 puntos aron pangulohan ang Casino, samtang sila si Limalima ug Bragat parehong miabuno og 10 puntos sa maong kapildihan.
Puntos Matag Usa
Super Idols (65) - B. Santiago 20, Pepito 17, R. Quijano 10, Salubre 4, Malig-on 4, M. Santiago 2, Abayon 2, Garcia 2, C. Quijano 2,Ibones 2, Fernandez 2
Casino (62) - Bauzon 19, Limalima 10, Bragat 10, Dumon 8, Mañus 8, Sumampong 5, Yap 2. – BANAT NEWS