Buzzer- beater ni Navarro mituboy sa AMBL

CEBU, Philippines - Ang buzzer-beating three-pointer ni Lito Navarro maoy nagtuboy sa AMBL ngadto sa kulbahinam nga kadaugan batok sa Heartvit, 108-107 sa overtime niadtong Miyerkules sa gabii sa Punta Princesa Ball Club (PPBC) 2009 Vice Mayor Mike Rama Cup basketball tournament diha sa Don Vicente Sotto Memorial Gym sa barangay Punta Princesa, ning dakbayan.

Kanunay naglabaw ang Heartvit gikan sa pagsugod hangtod sa daginutong oras sa duwa, apan natabla ang iskor, 92-all dihang si Robert Abasolo miposa sa iyang duha ka free throws nga mihatod sa duwa ngadto sa overtime.

Sa overtime, gawas nga nagsige og tabla ang duha ka kampo, nag-ilogay sab kini og labaw hangtod nga si Navarro mibuhi sa iyang marka-bahala nga 3-pointer sayong paghuni sa buzzer.

Si Navarro mikadlit og 37 puntos, samtang si Abasolo miduslit og 20 puntos alang sa AMBL, kinsa nagbitbit og 3-1 win-loss record. Sila si Allan Lim, Jun Felicitas ug Nikki Ibona miabuno og 10 puntos matag usa.

Ang beteranong point guard nga si Michael Arias maoy nangulo sa Heartvit pinaagi sa iyang 25 puntos. Si Rey Jumamil mihakot og 21 puntos   alang sa 2-1 nga Heartvit.

Sa laing duwa, ang Wilkris mikulit sa labing una nilang daog sud sa lima ka duwa pinaagi sa paglubong sa Cebu Unique Trade Center sa iskor nga 96-80.

Si Jay-R Caballero maoy nangulo sa Wilkris nga miburak og 35 puntos, samtang si Billy Cañedo miamot og 20 puntos.

Ang pilderong Cebu Unique Trade Center gipangulohan ni Louie Navarro sa iyang 24 puntos, gisundan ni Rolly Catubig nga adunay 18 puntos.

Puntos Matag Usa

Unang duwa:

AMBL (108) - Navarro 37, Abasolo 20, A. Lim 10, Felicitas 10, Ibona 10, D. Lim 7. Alesna 6, Ciabo 4, Quiroz 2, Go 2

Heartvit (107) - M. Arias 25, Jumamil 25, Zamora 15, Tagalog 12, F. Lim 11, Babatid 8, Sanchez 7, Mosqueda 6, Reyes 2

Ikaduhang duwa:

Wilkris (96) - Caballero 35, Cañedo 20, Magan 14, Arias 12, Sta. Iglesia 10, Maneja 8, Tero 2

Unique Trade (80) - Navarro 24, Catubig 18, Faunillan 10, Sullano 10, J. Ciabo 6, M. Ibona 3, Libre 3, Tiu 2, B. Navarro 2, Batoon 2. - Gabby G. Malagar (BANAT NEWS)