NCR miratsada sa unang adlaw sa Milo Little Olympics National Finals

CEBU, Philippines - Hayag gyud ang kaugmaon sa National Capital Region (NCR) nga ilang masakmit ang over-all championship dihang miratsada kini sa unang adlaw sa Milo Little Olympics National Finals kagahapon diha sa Cebu City Sports Center.

Bisan og naapektohan og maayo ang ilang lugar tungod sa sunod-sunod nga bagyo, mipakita gihapon sa ilang katakus ang mga atleta sa NCR human nila giharos ang athletics event.

Ang NCR kasamtangang nag-una sa standings human sila mipupo og 55 puntos sa athletics boys, gisundan sa Luzon ug Team Bisdak nga nagtabla sa ikaduhang dapit sa ilang 43 puntos, samtang ang Mindanao mipahiluna sa ikatulong dapit nga adunay 34 puntos.

Nanghawod usab ang NCR sa girls secondary ug elementary levels, samtang ang host team nga Visayas mao ang nag-una sa athletics boys sa elementary level.

Si coach Merlo 'Eloy' Pornobi, deputy head sa delegasyon sa NCR nga nahinabi sa Banat News mi-asoy nga wala sila’y laing tumong kun dili ang pagsakmit sa labing unang titulo sa National Finals. Matud pa ni Pornobi nga bisan pa man og aduna sila'y mga atleta nga ni-backout tungod sa bagyo, wala gihapon mawala ang hugot nilang tinguha nga modaog.

Dugang pa ni Pornobi nga daku ang ilang pagtuo nga modominar tungod kay anaa kanila ang pipila ka mga atleta nga miyembro usab sa RP Team.

Mihipos usab og lima ka bulawang medalya sila si Sofia Beatrice Guanio, Myke Daren Wong, Joy Cristine Mendoza ug Judith Cruz alang sa NCR.

Hinuon, wala usab magpa-uwahi ang Visayas dihang misakmit usab og bulawang medalya ang pambato sa University of San Carlos (USC) nga si Loren Dale Echavez sa 100m freestyle ug si Anthony Linn Navarro sa 50m backstroke.

Sa taekwondo event, ang   Luzon mikabkab og tulo ka golds usa ka silver ug tulo ka bronzes sa secondary level, samtang   upat ka golds, duha ka silvers ug usa ka bronze ang nasakmit sa elementary level.

Nakapuntos sab ang Team Bisdak dihang nanghawod sila sa secondary ug elementary level sa scrabble events.

Si Phil Robert Figues mirehistro og 566 puntos nga mao ang labing daku nga iskor nga nahimo sud sa usa ka duwa.

Nakabawi usab ang Visayas dihang giharos nila ang gold medals sa football. Ang Sacred Heart School-Jesuits (SHS-J) mimasaker sa NCR, 3-0 sa elementary level, samtang ang Abellana National School misiro sa Luzon, 2-0 sa secondary level.

Nagsawo sa no. 1 spot ang Visayas ug NCR sa elementary ug secondary levels sa girls volleyball, samtang ang University of Southern Philippines Foundation (USPF) maoy mitunol og gold medal sa Visayas sa secondary volleyball boys division.   (BANATNEWS)