CEBU, Philippines - Mag-abot na usab ang mga batan-ong amateur boxers gikan sa mga inilang stable dinhi sa Sugbu alang sa laing edisyon sa Cebu City Amateur Developmental Tournament nga giulohan og “Paboksing sa Barangay 2009” karong gabii diha sa Barangay Apas Gym, ning siyudad.
Ang mga boksidor gikan sa Cebu City Sports Center (CCSC) stable nga mopadala og mga boksidor sa nagkalain-laing timbang mosuway na usab og haros sa torneyo.
Ang CCSC pangulohan sa managsuong Eran ug Ardie Boyose, Alil Ala, Jay-R Barroma, Ramjess Colinas ug Alla Refuella nga pulos midaog sa miaging Paboksing sa Barangay Guadalupe Leg.
Gawas sa CCSC, mopakita usab sa ilang abilidad ang mga boksidor gikan sa Omega Boxing Stable sa Mandaue City, Sta. Cruz Stable sa Talisay City, CBA Stable (kanhi LOSAMBA Stable), Sanai Gym, Bogo Stable ug Talamban.
Ang maong torneyo gipasiugdahan sa Cebu City Sports Commission uban sa abag sa opisyales sa Brgy. Apas ubos sa liderato ni Brgy. Captain Ramil Ayuman ug sa Cebu City Government sa pangagamhanan ni Mayor Tomas Osmeña. – BANAT NEWS