CECABA midonar og P1.8 million ngadto sa CEC Dragons

CEBU, Philippines - Tungod sa pait nga gidangatan sa Cebu Eastern College (CEC) Dragons sa miaging elimination round sa Cebu Schools Athletic Foundation Inc. (CESAFI), ang Cebu Eastern College Alumni Basketball Association (CECABA) sa pagpangulo ni Chester Cokaliong nakahukom nga mobubo og P1.8 million alang sa three-year comprehensive basketball program aron palig-onon ang Dragons.

Sa press conference nga gipahigayon niadtong miaging gabii diha sa White Gold House, si Cokaliong miangkon nga nahigmata na ang alumni sa CEC human sa makau-uwaw nga performance sa elimination round diin ang Dragons nangitlog sud sa walo ka duwa.

Kahinumduman, ang Dragons gilubong og kapin sa 100 puntos sa matag koponan nga ilang gikasangka sa elimination, usa na niini batok sa University of the Visayas (UV) Baby Lancers nga mikulit sa all-time record nga 155 puntos nga lubong.

Matud pa ni Cokaliong nga nasagmuyo sila human migawas sa mga pamantalaan dinhi sa Sugbu ang nahitabong pag-masaker sa ilang varsity team ug nauwawan ang CECABA All-Stars nga usa sa mga respetadong non-professional basketball team dinhi sa Sugbu.

Tungod niini, si Cokaliong uban sa CEC alumni nga sila si Jefferson Go, Steven Villabert, Eric Ong III ug CECABA All-Stars Joel Chan, Sammy Sia ug Wilson Yu, mihimo og lakang aron palig-onon ang Dragons pinaagi sa paglusad og bag-ong Basketball Program.

Pasiuna sa maong lakang, sila si Cokaliong ug Ong kinsa midonar og P100,000, mikuha sa serbisyo sa upat ka coaches nga naglakip nila ni ex-Cebu Gems assistant coach Rex Salvaña ug kanhi USJ-R Jaguar Albert Aloncillo alang sa elementary level ug sila si Jerry Jaranilla ug Lou Regidor sa secondary division.

Si Jaranilla mao ang kanhi head coach sa Ateneo de Iloilo nga misakmit og titulo sa National Basketball Conference (NBC) ug sa Mindanao Visayas Basketball Association (MVBA), samtang ang kanhi PBA player nga si Regidor nahimo usab nga usa sa mga sinaligan ni multi-titled coach Raul 'Yayoy' Alcoseba sa M. Lhuillier Kwarta Padala.

Gawas sa pagkuha og mga dekalibreng coaches, si Cokaliong mohatag sab og bonus sa coaches ug players sa matag duwa nga ilang madag-an sa elimination, semifinals ug mas daku motubo kini kun moabot sa finals. Ang mga magduduwa sa CEC hatagan usab og libreng scholarship, monthly allowance ug libreng board ug lodging.

Gipahibalo sab ni Sia, nga karong Nobiyembre 7, 14 ug 21   adunay ipahigayon nga try-out sa alas-2 sa hapon diha sa CEC gym. Bukas kini sa tanang mahiligon og basketbol nga nagpangedaron gikan sa   otso ngadto sa 15-anyos.

Hinuon, ang madawat sa try-out kinahanglan usab nga mo-agi og usa ka entrance exam sa dili pa sila ilakip sa maong training program. Midugang si Ong nga lakip sa ilang training mao ang pagsalmot nila sa uban pang mga torneyo sama sa MILO, FBL ug CYBL. – BANAT NEWS