UV Lancers nakauna

CEBU, Philippines - Wala kaayo makabuylo ang higanteng sentro nga si Gregory Slaughter, apan ang iyang kabugnaw gitubos nilang Phil Mercader ug Ritchum Dennison alang sa University of the Visayas (UV) Green Lancers, kinsa mipukan sa higpit nga karibal University of Cebu (UC) Webmasters, 64-56 sa Game-1 sa ilang best-of-five" finals series sa 9th Cebu Schools Athletic Foundation, Inc. (CESAFI) niadtong Huwebes sa gabii diha sa Cebu Coliseum.

Ang Lancers nabiyaan og 10 puntos, 48-38 sa sayong bahin sa fourth period, apan milusad kini'g makabungog nga 24-8 run aron sakmiton ang momentum.

Si Slaughter maoy mipatilaw sa Lancers sa labing unang labaw human sila mihimo’g 21-2 nga rally, 51-50 pinaagi sa iyang usa ka free throw sa nahabiling 4:33 sa duwa. Napun-an sab kini ni Dennison pinaagi sa iyang three-point shot aron inaton ang labaw sa Lancers, 54-52.

Katapusang nakalabaw ang UC sa iskor nga 52-51 gikan sa drive ni Fajardo sa katapusang 4:06 sa duwa.

Ang 6-foot-11 nga si Slaughter naglisod ug wala makawadwad og maayo tungod sa hugot nga depensa ni 6-foot-9 nga si June Mar Fajardo. Apan bisan pa niini, siya gihapon ang topscorer sa Green Lancers nga miburak og 16 puntos, gisundan ni Mercader nga mipupo og 12 puntos, samtang si Dennison miabuno og 10 puntos.

Si Fajardo, kinsa nakatapal ni Slaughter sa makaduha ka higayon, maoy nangu sa Webmasters pinaagi sa iyang 21 puntos, apan wala siya mahatagi og maayong suporta gikan sa iyang mga teammates ilabi na nilang Janssen Abella ug Moncrief Rogado nga igo lang nagkumboya og 10 puntos.

Sa secondary division, ang Cebu Institute of Technology (CIT) Wildkittens maoy unang nakabentaha human nila gipilde ang University of San Jose-Recoletos (USJ-R) Baby Jaguars sa Game-1 sa ilang kaugalingong best-of-five series sa iskor nga 68-60.

Mi-ulbo ang kagubot ug diriyot magsukmagay nga miresulta sab sa pagka-suspenso sa tulo ka sakop sa Wildkittens, nga sila si Joseph Nalos, John Merlow Gera ug Carlo Figuracion tungod sa pagsulod nila sa korte ug ingon man Venjie Trozo sa Baby Jaguars. Sila si Nalos, Gera ug Figuracion dili na makaduwa sa nahabiling mga duwa niini nga season. 

Ang foul ni Trozo ngadto kang   Batiquin maoy mihaling sa kagubot samtang igo lang untang misuway og tabang ang mga kauban sa tagsa-tagsa ka teams.

Gitawgan sab og technical foul si Gudeve Edu Autentico sa Baby Jaguar tungod sa second motion.

Ang Wildkittens, kinsa nagtinguha sa labing una nilang korona sa kasaysayan sa CESAFI, gipangulohan ni Batiquin nga mitangag og 19 puntos, samtang si Mark Jayven Tallo miamot og 18 puntos.

Sila si Trozo ug Autentico parehong mi-iskor og 16 puntos alang sa Baby Jaguars.

Puntos Matag Usa

Unang duwa: (Juniors championship)

CIT (68) - Batiquin 19, Tallo 18, Pamaong 9, Nalos 8, Sanchez 7, Gera 4, Limalima 2, Koino 2

USJ-R (60) - Autentico 16, Trozo 16, Muñez 11, Go 5, Montecillo 4, Alob 3, Senining 2, Figues 2, Mante 1

Ikaduhang duwa: (Seniors championship)

UV (64) - Slaughter 16, Mercader 12, Dennison 10, Diputado 7, Lao 6, Cincoflores 5, Olivares 4, Cabahug 2, Señeres 2

UC (56) - Fajardo 21, Quilantang 7, Abella 6, Mohamad 5, Tano 5, Luceño 4, Rogado 4. – BANAT NEWS