"Run for Ondoy' nagmalampuson

CEBU, Philippines - Ang kanhi sikat nga singer ug aktres nga si Donna Cruz- Larrazabal mao ang midaog sa 10k women’s division sa nagmalampusong “Run for Ondoy”, kagahapon sa buntag didto sa Cebu Doctor’s University sa North Reclamation area.

Si Cruz-Larrazabal kinsa mao ang usa sa mga tigpasiugda sa maong Fundraising Run mitapos sa lumba sulod sa oras nga 52:19.546, nagsunod kaniya sila si Rosan Trani sa oras nga 56:35.045 alang sa ikaduhang dapit, samtang ang sister-in-law ni Cruz-Larrazabal nga si Bettina Veloso mao ang misakmit sa ikatulong dapit sa oras nga 57:52.95.

Sa iyang bahin, si Paul James Zafico maoy nanghawud sa 10k men’s division human niya gitapos ang lumba sa oras nga 37:15.78. Nagsunod ni Zafico mao sila si Dandy Maturan (40:43.27) ug Dennis Salentes (45:23.51) sa second ug third place.      

Ang kapikas ni Donna nga si Dr.Yong Larrazabal mipahiluna sa ikalimang dapit sa oras nga 45:23.51.    

Sa 5k women’s division, si Melinda Ponce mao ang midaog sa iyang oras nga 26:25.58 batok nila ni Catherine Cabahug ug Mary Christine Tio nga maoy nahimo niyang runner-ups.

Nakadawat usab og special awards ang 10-anyos nga si Oliver Panlibuton isip youngest runner ug ang 65-anyos nga si Jose Vasquez nga maoy oldest runner. 

Si Joel Baring, race director, mipahibalo sa Banat News nga ang maong lumba nakatigom og usa ka gatus ka libo, diin ang katunga nga singkwenta mil nagagikan sa Cebu Doctor’s Group of Hospital and University nga gipangulohan ni Dr. Potenciano Larrazabal Jr.

Ang kinatibuk-ang salapi, lakip na ang canned goods ug used clothing nga gidonar sa mga runners ihatag ngadto sa ABS-CBN Foundation “Sagip Kapamilya”. - Lemuel P. Maglinte (BANAT NEWS)