Lancers sulod sa finals

CEBU, Philippines - Sa ika-siyam nga higayon, mi-abante na sab sa finals ang eight-time ug defending champion University of the Visayas (UV) Green Lancers.

Gipalagpot sa Lancers ang no. 4 seed University of San Jose Recoletos (USJR) Jaguars human sa ilang, 82-67 nga kadaogan kaniadtong Sabado sa semifinals sa nagpadayong Cebu Schools Athletic Foundation, Inc. (CESAFI) didto sa Cebu Coliseum.

Ang Lancers midaog sab sa Game 1 sa iskor, 88-73 ug hingpit mipalagpot sa Jaguars pinaagi sa two-game sweep. Ang Jaguars maoy ilang gikabagat sa best-of-five finals sa miaging tuig diin ilang gitapos ang serye sa 3-1 nga baraha.

Sa kasamtangan, maghuwat pa una ang Lancers kung kinsay ilang kaatbang alang sa finals tungod kay padayon pang nagbugno ang topseed University of Cebu (UC) Webmasters batok sa no. 4 seed University of San Carlos (USC) Warriors alang sa ikaduhang luna sa finals.

Ang Webmasters nagkinahanglan lang og usa ka daog human sa ilang 98-91 nga come-from-behind nga kadaogan sa Game 1 ug nagkaduol ang gikahinaman nga sangka tali nila ni June-Mar Fajardo ug Gregory Slaughter atol sa pagsugod sa best-of-five finals ugmang adlawa.

Niadtong 2005 finals, ang Webmasters miyukbo sa Lancers sa best-of-three title series diin nagduwa pa kanila ang ilang captain ball nga si Kenneth Kern Sesante apan wala pa si Fajardo ug wala pa usab si Slaughter sa UV.

Ang gamitoy apan abtik nga point guard nga si Kelvin Juliane maoy nahimong bayani alang sa Webmasters batok sa Warriors dihang nagpauwan siya'g lima ka three-pointers sulod lang sa fourth quarter ug wala siya’y sipyat sa iyang lima ka tirada.

Ang iyang kainit gikan sa three-point area maoy nagduslit sa usa ka makalilisang nga rally diin gipapas sa Webmasters ang ilang biya nga kinse puntos, 66-51 sa fourth period ug biya sab sila'g 15 puntos sa halftime, 36-51.

Gitabla ni Juliane ang iskor sa 72 ug dayon ang tres ni Moncrief Rogado maoy naghatag og 75-72 nga labaw sa UC ug laing tres ni Juliane ang nakahatag og 78-75 nga abante.

Si Juliane mihipos og 18 puntos alang sa Webmasters apan si Fajardo maoy nangu sa ilang opensa sa iyang 27 puntos ug si Rogado midugang og 20 puntos.

Sa laing bahin, si Slaughter miposa og 20 puntos alang sa Lancers ug wala makapugong ang Jaguars kaniya sa poste.

Sila si Aniceto Lapiz Jr. ug Jerome Villaver mi-iskor og 16 ug 15 puntos alang sa Jaguars.

Puntos matag usa:

First Game:

UC (Srs.) 98— Fajardo 27, Rogado 20, Juliane 18, Abella 15, Luceño 9, Quilantang 2

USC (Srs.) 91— Padillo 22, Bautista 17, Hermosa 15, Cantonao 15, Gallarde 12, Cortes 7, Bakker 7, Codilla 6 Halftime: 36-51

Second Game:

UV (Srs.) 82— Slaughter 20, Cincoflores 13, Lao 12, Mercader 11, Dennison 9, Señeres 6, Canahug 2, Calo 2, Silva 2, Olivares 2

USJR (67)— Lapiz 16, Villave 15, Amores 11, Dela Rama 7, Bibera 5, Duran 4, Pateño 3, Dela Peña 3, Nudalo 3 Halftime: 41-32. - BANAT NEWS