Tigers gisungag sa Barako Bull

CEBU, Philippines - Gidimalas pag-maayo ang Coca Cola Tigers dihang gipakaging sila sa batan-ong Barako Bull Energy Boosters, 81-73, gawas pa niini na-injured usab ang ilang sinaligang sentro nga si Asi Taulava, kagabii didto sa Araneta Coliseum. Wala kaayo makapakita og aksiyon ang higante sa Tigers nga si Taulava human kini makahiagum og injury sa walang tuhod sa first period. Si Taulava daling giagak paingun sa bench ug dayun gidala ngadto sa tambalanan aron masuta ang kahimtang sa tuhod niini.

Hinuon, ang Tigers nga mao ang inilog sa maong duwa, mipakita sa ilang kabangis sa pagpangulo nila ni Alex Cabagnot ug Norman Gonzales nga mikumboya og 15 puntos aron ihatag sa Tigers ang kwatro puntos nga labaw sa first half, 45-41.

Apan pag-abot sa final period, kalit lang nanginit ang Barako Bull sa pagpangulo ni Magnum Membrere ug Yussif Aljamal nga maoy mihatag sa uno punto nga labaw batok sa Tigers sa nahibling sayes minutos sa duwa, 67-66.

Mipatusak usab og duha ka sunod-sunod nga three-point shots sila si Ogie Menor ug Sugbuanong guwardiya nga si Donbel Bellano aron inaton ang labaw ngadto sa kwatro puntos, 76-72, sa nahibiling 1:16 sa duwa.

Ang kanhi Ateneo de Manila University (ADMU) point-guard nga si Membrere maoy gibayaw nga player of the game   pinaagi sa iyang 14 puntos, samtang si Larry Rodriguez maoy mibahug   alang sa pilderong Tigers sa iyang 10 puntos ug 18 ka rebounds. – BANAT NEWS