CEBU, Philippines - Gipamatud-an ni Rey 'Boom Boom' Bautista nga wala pa gihapon molubad ang iyang abilidad bisan og wala kini igdungog sud sa 11 ka bulan.
Gibuhian ni Bautista ang iyang talagsaong kusog nga nakapayaka ni Indonesian champion Marangin 'Dinamita' Marbun sa round 7 aron masakmit ang interim WBC International featherweight title sa main event sa “Hamon sa Kampeon” niadtong Biyernes sa gabii diha sa Pacific Grand Ballroom sa Waterfront-Cebu City Hotel sa Lahug, ning siyudad.
Ang garbo sa Candijay, Bohol nga si Bautista mibuhi og makabungog nga left-right combination nga maoy mipahagsa sa 17-anyos nga Indonesian sa nahabiling 1:25 sa round 7.
Tungod sa kakusog sa kumo ni Bautisa, wala dayon makabarog si Marbun ug gidapatan kini'g oxygen kay naglisug og ginhawa.
Ang 22-anyos nga si Bautista, kinsa nagbitbit karon og rekord nga 27-2, 20KOs, unang mipatumba ni Marbun sa round 3, apan nakahimo pa sa pagbarog ug gani mibuhi sab kini og mahait nga suntok nga igo gyud nakatay-og ni Bol-anong fighter.
Si Bautista, kinsa nakaangkon og gamay'ng gisi sa iyang ilong ug aping, nagkanayon nga usa ka lisud nga kontra si Marbun, apan gigamit lang niya ang iyang tayming aron buhian ang iyang nagbagang kinumo.
Sa laing aksiyon, laing ALA fighter nga si Czar Amonsot ang milampos sab sa iyang tinguha human midaog pinaagi sa unanimous decision batok ni Jesus Muzaka sa Democratic Republic of Congo.
Tulo ka hurado ang mi-iskor og 96-94, 97-93, 98-93, pabor ngadto ni Amonsot.
Si Amonsot nagtangag karon og 21-3-1. 11KOs nga rekord.
Midaog usab ang reigning WBO Youth lightweight champion nga si Jason Pagara pinaagi sa unanimous decision batok ni Decha Bankluaygym sa Thailand, samtang midaog sab pinaagi sa 10th round TKO ang laing ALA fighter nga si Marjun Yap batok sa beteranong si Pramuansak Poosowan.
Mikompleto sa resulta sa undercard mao si Jefferson Reodoque, kinsa mipilde ni JR Salvador ug si Fernando Okon midaog batok ni Jomar Cordinillo. (BANATNEWS)