"Run for Ondoy" Charity Run andam na

CEBU, Philippines - Dul-an na sa usa ka libong entrante ang miparehistro sa “Run for Ondoy” charity run nga mosikad sayo sa buntag ugma diha sa Cebu Doctor's University (CDU) grounds sa north reclamation.

Ang maong lumba nga gipasiugdahan sa Run for Sight Foundation adunay duha ka kategoriya -- 10K ug 5K Open.

Gimugna ang maong kalihukan aron makatigom og salapi aron itabang sa atong mga kaigsuonan didto sa kaulohan nga nabiktima sa bagyong “Ondoy.”

Lakip sa mosalmot mao ang Sundays Runners ug uban pang nagkadaiyang running clubs sa Sugbu. Modagan usab ang mga tinun-an sa Cebu Doctor's University ug mga kawani sa Cebu Doctors Hospital.

Mga tang-an runners sa Sugbu sama nilang Mendel Lopez, Madelyn Carter, Mary Grace delos Santos ug ang managsuong Joel ug Eugene Delposo gipaabot sab nga modagan.

Sa laing bahin, si Lalaine Mercado, ang secretary ni Dr. Potenciano 'Yong' Larrazabal III sa CDU Center for Sight mipahibalo dinhi sa Banat News nga ang matigom nga salapi sa maong charity run doblehon sa Cebu Doctors Group ubos sa pagpangulo ni Dr. Potenciano Larrazabal Jr.

Ang kinatibuk-ang salapi, lakip na ang mga canned goods ug used clothing nga idonar sa mga runners ihatag ngadto sa beneficiary nga mao ang ABS-CBN Foundation “Sagip Kapamilya.”

Alang niadtong buot mosalmot ug motabang, ang registration fee nagkantidad og P300 lakip na niini ang race number. Ang deadline sa registration hangtod lamang karong ala-1:00 sa hapon diha sa CDU Center for Sight ug Cebu City Sports Center. – BANAT NEWS