CEBU, Philippines - Gibuntog sa Super Idols ni coach Bong Pepito ug assistant coach Erwin Heyrosa ang Casino Rubbing Alcohol, 77-63 aron pagposte og 1-0 nga bentaha sa ilang "best-of-three" finals series sa 3rd Integrated Bar of the Philippines (IBP) 2009 basketball season niadtong Sabado diha sa Capitol Parish Gym sa dalan Escario, ning siyudad.
Ang Super Idols milansang og 19-12 nga bentaha ug ila pa kining giinat ngadto sa 11 puntos sa halftime, 39-28.
Ang Casino, luyo sa mga paningkamot nilang Richard Bauzon, William Mañus ug Wilbert Dumon, mi-rally sa ikatulong kuwarter aron pahakan ang labaw ngadto na lang sa sayes puntos, apan ang Super Idols mipabuhagay sa ilang mga puntos aron inaton og balik ang labaw hangtod nga naangkon ang 14 puntos nga kadaugan.
Si Benjo Santiago maoy topscorer sa Super Idols sa iyang 20 puntos, samtang sila si Fermin Pepito ug Ramsey Quijano nagkumboya og 25 puntos.
Si Bauzon mao sab ang nangu sa Casino sa iyang 17 puntos.
Sa sayo pa, nalangkat sa Pañeros ang ikatulong puwesto human sa ilang 72-63 nga kadaugan batok sa Pecandela Law Firm.
Si Michael Molde miposa og 18 aron pangulohan ang Pañeros, gisundan nilang Ting Ordeniza ug Gilbert Ruaya nga mibugha og 10 puntos matag usa.
PUNTOS MATAG USA
Unang duwa:
Pañeros (72) - Molde 18, Busi 15, Ruaya 10, Ordeniza 10, Balorio 8, Caliapyan 5, Pepito 2, Dinopol 2, Manching 2
Pecandela (63) - Malazarte 21, Tagsip 18, F. Pepito 14, Gomos 6, Enad 4
Ikaduhang duwa:
Super Idols (77) - B. Santiago 20, Pepito 14, R. Quijano 11, Salubre 6, Abayon 6, M. Santiago 5, Ibones 4, Fernandez 4, Garcia 3, B. Quijano 2, Daluz 2
Casino (63) - Bauzon 17, Mañus 14, Dumon 12, Sumampong 8, Limalima 8, Tambago 2, Bragat 2 (BANATNEWS)